my karooland
Ma, 03 Oktober 2022 11:31
land van niks … land van oorvloed …
land van min … land van vele …
land van ys … land van hitte …
land van koue … land van warmte …
land van dood … land van lewe …
land van Satan … land van God …
dit is wat my groot karooland vir my is
Prosa & poësie |
0 kommentare
die waarheid
Ma, 03 Oktober 2022 11:26
hello pa
vir vier-en-sestig jaar het ek gewonder
gewonder wat die waarheid was
gewonder watter soort mens jy was
gewonder of jy my lief gehad het
gewonder hoekom jy weg moes gaan
gewonder hoekom jy my net so gelos het
ek was nog so bitterlik klein gewees
maar net een jaar en elf maande oud
jyself was ook nog baie jonk gewees
maar slegs twee-en-veertig jaar oud
ek was vir jou baie kwaad
so kwaad dat dit vyftig jaar sou duur
voordat ek met jou kon praat
nou het ek die waarheid gehoor
en dit maak baie seer
maar ten minste verstaan ek
verstaan ek presies wat gebeur het
verstaan ek jou geweldige pyn
verstaan ek jou skuldgevoel
maar iets wat ek glad nie kan verstaan
is jou hantering van daardie gevoel
want dit het jou van my af weggeneem
en daarvoor is ek kwaad
ek mis jou vreeslik baie
omdat ek jou werklik nodig het
ek sou so graag in die veld wou stap
en met jou gesels en leer ken
sodat jy jou kennis met my kon deel
Prosa & poësie |
0 kommentare
orde in die natuur
Sa, 01 Oktober 2022 12:38
ek staan op die agterstoep
en kyk na die voëlbad in die tuin
soos vliegtuie op ‘n internasionale lughawe
kom voëls van oral af om daarop te land
vir ‘n vinnige drankie of twee
of dalk vir ‘n verfrissende bad
terwyl ander dit net as ‘n rusplek gebruik
om ‘n bietjie stoom op af te blaas
op die lang vlug na ‘n onbekende bestemming
maar wat my dadelik opval
is die wedersydse respek en orde
wat hierdie voëls openbaar
Prosa & poësie |
0 kommentare
moeder
Sa, 01 Oktober 2022 12:04
ek weet nie juis waar om te begin
want oor die jare heen het u die rol van so baie mense in my lewe gevul
die rol van moeder en van vader
van onderwyseres en van vriendin
ook van dominee en van geneesheer
en nog baie baie meer
maar nooit het ek u hoor kla
oor al die eise wat hierdie rolle van u vra of die min ure in die dag
selfs nie oor die rebel wat ek was
en daarvoor wil ek graag sê baie, baie dankie, ma
vir die kinderlewe wat ek kon deel
met ‘n moeder soos u, so spontaan, so veel
daar is egter ook ‘n ander kant
van u wat gehelp het om my die mens te maak wat ek is
en dit is die spontane rol as mens
bakmens, tuinmens, kunsmens en mensmens want
dit het in my die basis gelê
van iets spesiaals wat elke kind behoort te hê
ek weet dit was ‘n baie moeilike tyd
toe u die lewe van boervrou vaarwel moes roep in ruil vir die dorp
maar ten spyte van dae en nagte vol vrae
en die kloppende rou van die wrede afskeid
was u steeds vir ons kinders altyd daar
en dit sal ek vir ewig in my hartkamers bewaar
wat meer is daar dan om te sê
as dat dit werklik net ‘n geskenk van God kan wees
om vir brose mensekinders die voorreg te gee
om ‘n moeder soos u te mag hê
ek weet nie werklik hoe om u te bedank
maar wat ek geleer het sal my bybly lewenslank
Prosa & poësie |
0 kommentare
om 100 te word
Sa, 01 Oktober 2022 12:02
om 100 jaar oud te word is genade
maar om op 100 nog die voëltjies te hoor sing
die koerant te lees
en ‘n paar gedigte spontaan voor te dra
na ‘n vroegoggend se stap langs die see
is meer as genade
dit is ‘n geskenk vanuit die Hemel
Prosa & poësie |
0 kommentare
om alleen oud te word
Sa, 01 Oktober 2022 10:52
die lewe is uiters broos en kosbaar
maar dit is so vreeslik kort
dat elkeen wens hy word gespaar
om alles te kan doen wat die lewe bied
dis ‘n wonderlike gawe om lank gespaar te word
en boonop goeie gesondheid te geniet
maar hoe voel dit werklik
om alleen oud te word
nie alleen omdat ander te vroeg gesterf het
maar alleen omdat jy so lank gespaar is
alleen sonder familie en kennise
alleen in ‘n wêreld wat jy nie meer ken
alleen tussen miljoene wat jy nie meer verstaan
Prosa & poësie |
0 kommentare
ode aan 'n jagter
Do, 29 September 2022 15:07
/gwi, !kung, /xam, !xô
kleine mensies van die veld
stadig het julle suidwaarts beweeg
om uiteindelik hierdie suiderland te kom bewoon
in hierdie land van oorvloed
wat vir etlike eeue julle tuiste was
was julle veldmens, woestynmens, vlaktemens en bergmens
en elke voetpaadjie, elke spoor, elke plant en elke krans
het julle geken
julle het die natuur respekteer
want julle was ook liefdesmens, mensmens
daardie liefde straal vandag nog vanaf jul grotwande uit na ons
maar tyd het julle ingehaal
want die swartman het gekom
en julle sy slawe gemaak
waarna die witman kom
en julle stelselmatig begin uitwis
julle land van oorvloed het geen oorvloed meer
en die meeste dier en plant van julle tyd
staan nie meer in die veld
julle voetpaadjies het reeds jare terug verdwyn
en selfs vele van jul grotkunswerke is reeds weg
ja, die pragtige kliek-klak van jul tale het vir ewig stil geword
maar vandag dink ons met deernis terug aan die mensies van heitsi-eibib
as ons ons land se leuse sê: !ke /xarra //ke
Prosa & poësie |
0 kommentare
myner van die duineveld
Wo, 28 September 2022 18:27
wat is werklik die doel van jou bestaan
daar waar jy jou weg in donkerte onder tuine en paaie deur baan
want jou enigste nut wat ek kan sien
is geld wat die koöp in uit slagysters en pille wat hul voorsien
met die miniatuur sandvulkane
maak jy die uitgelegte van ons mooi parke en tuine ongedane
waar vele plante onder sand verdwyn
en net soveel ander weens afgeknaagde wortels in die beddings kwyn
menige dier het reeds ‘n been gebreek
omdat hul in volle vlug per ongeluk ‘n voet in jou gate steek
of struikel oor een van jou vulkane
daar waar hulle daagliks hul weg oor die vulkaanbesaaide veld moet bane
jy sou vir elk van ons ‘n guns doen hier
as jy ook sig kon hê en bogronds kon lewe soos elke ander dier
dan kon jy dit gou-gou na ‘n plant waag
‘n gat langs die stam af grawe en heerlik aan die wortels sit en knaag
Prosa & poësie |
0 kommentare
my tweede kans
Wo, 28 September 2022 18:25
my hele wese wil U loof en prys met sang en dans
uit dankbaarheid vir hierdie tweede kans
so onverdiend van U ontvang
te midde van al die lyding in elke hospitaalgang
mag ek hierdie tweede kans nooit vergeet
maar altyd van u Almag weet
sonder om die kennis daarvan vir myself te hou
deur dit aan die ganse wêreld te laat ontvou
Prosa & poësie |
0 kommentare
Supertaal
Blog
Soek
Hulp
Lede
Registreer
Teken aan
Tuis
RSS
