Radiospeler Radiospeler
 
Supertaal
Kom praat saam!

Wys: Vandag se boodskappe :: Onbeantwoorde boodskappe :: Stemmings :: Navigasie
Hartlik welkom! Op hierdie webtuiste kan Afrikaanse mense lekker in hul eie taal kuier, lag en gesellig verkeer. Hier help ons mekaar, komplimenteer mekaar, trek mekaar se siele uit, vertel grappe en vang allerhande manewales aan. Lees asb ons aanhef en huisreëls om op dreef te kom.

straatgesin

Di, 16 Augustus 2022 11:21

sag val die reën op die struik
die struik wat as tuiste vir vyf mense dien
‘n ouerpaar en hul drie jong kinders
kinders wat môre uitgerus en vars
die skoolbanke moet trotseer

wind kom van veraf sneeubedekte pieke
die takke van die struik in beweging bring
dieselfde takke wat die mense moet beskerm
terwyl die sagte reën nou in vlae neergiet
en die struik se blare in stortkoppe omvorm

velle stukkende vullissakplastiek
word haastig oor die kinders
soos motgevrete komberse oopgesprei
kinders wat weens die reën
nog niks warms ingeneem het nie

kartonmatrasse word al natter
soos water by die gate in die plastiek inloop
terwyl die kinders probeer slaap
deur die geluid van die storm
met koue- en hongerpyne wat al veller knaag

wat steeds nag is vir baie mense
word opstaantyd vir hierdie gesin
want hulle moet die struik ontruim
voor die spitsverkeer begin
en stap om die kinders betyds by die skool te kry

moeg en vaak en honger en dors
bereik die kinders die skool teen skemerlig
met ‘n reuse glimlag word elke maatjie hartlik gegroet
dan word die kinders gegroet en omhels
deur moeë ouers wat so graag slegs die beste vir hul kinders wou gee

Prosa & poësie | 0 kommentare

kinders

Di, 16 Augustus 2022 11:20

kinders is soos vlinders
besonder kleurvol en vol van lewe
rats en vreesloos beweeg hulle
van een bestemming na ‘n ander

kinders het monde soos die van honde
vreeslik luid en alomteenwoordig
hoor jy baie meer van hulle
as wat jy werklik kan sien

kinders vra die hoekoms om die toekoms
en die nou te kan verstaan
om hulle vir die grootmenslewe
voor te berei

kinders is die aarde se waarde
die leiers, beplanners en beskermers van die môres
sonder hulle
kan daar geen eergisters wees

kinders van vandag vra ontferming van en beskerming
teen die kinders van die gisters
hulle smeek om liefde en respek
in plaas van verkragting en moord

Prosa & poësie | 0 kommentare

die plantjies in my tuin

Di, 16 Augustus 2022 11:18

dis winter
en dis gletserkoud
die grond is deurdrenk
na ‘n week van reën
en mens en dier
voel net pyn in die spier

maar daar word gejubel
en gedans en fees gevier
deur miljoene kindertjies
wat so pas die eerste lewenslig aanskou
te midde van hierdie kou’

met ‘n oorverdowende geraas
word rotsblokke verskuif
en vreemdelinge uit die pad gestoot
deur hierdie groen kindertjies van hout
daar waar hulle mens en dier
se weg versier

Prosa & poësie | 0 kommentare

om te onthou

Ma, 15 Augustus 2022 06:55

om te onthou
is om na die verlede te kyk
en te sien hoe die mooie en die lelike
van daardie tyd lyk

om te vergeet
is ‘n moeilike dog belangrike taak
want dit is wanneer jy
‘n einde aan die lelike maak

om te koester
is ‘n gawe deur God gegee
om die mooie uit die verlede te neem
en die toekoms in te gaan daarmee

Prosa & poësie | 0 kommentare

dankgebed

Ma, 15 Augustus 2022 06:54

baie dankie Liewe Heer
vir die wonderlike
maar onverdiende gawe
om my eeue oue moeder
in haar swakste uur te kon besoek

baie dankie vir die voorreg
om deur haar herken te word
en in gesprek met haar te kon gaan
om haar brose hande in myne te kon neem
terwyl sy ons in gebed aan U opdra

baie dankie dat ek hierdie besoek
in die teenwoordigheid
van my pragtige vrou en dogter kon hê
en weer kon besef hoe gelukkig ek is
hoeveel gawes U daagliks aan my voete lê

ek weet dat ek soms baie vrae vra
en seker ook oor te veel dinge kla
daarom bring ek U hierdie korte dankgebed
want het my moeder my nie gebaar
sou ek hierdie dankiewoorde nooit kon sê

Prosa & poësie | 0 kommentare

die groenkaart van suid-afrika

Ma, 15 Augustus 2022 06:52

om die amerikaanse groenkaart te ontvang
is iets om werklik op trots te wees
want die vereistes daarvoor is uiters hoog

maar die groenkaart van suid-afrika
is iets heeltemal anders
want die enigste vereiste is om ‘n voorheenminderbevoorregte te wees

dit bied aan jou die ongekende status van ‘n koning
wat beteken dat jy vrye toegang het tot
enige ander mens se vaste bates
enige ander mens se liggaam
enige ander mens se lewe
selfs die vaste bates van die staat
selfs die liggaam van die staat
selfs die lewe van die staat

die groenkaart van suid-afrika
is die ondergang van alle lewensvorme
in hierdie voorheen paradys van ‘n land

Prosa & poësie | 0 kommentare

'n ontdekkingsreis

Sa, 13 Augustus 2022 14:22

moeisaam stap ek op die amper 70 kilomer-lange dig toegegroeide voetpad van my lewe
tot by die hoë hoop gevaarlik opgestapelde klippe
en rotse
wat as die trappe na my hart se voordeur dien

voetjie vir voetjie klim ek met die trappe op
sodat ek nie die los klippe versteur en val nie
tot bo voor die rooi voordeur van my hart

versigtig stoot ek die reuse deur oop en tree na binne
waar ek myself in ‘n kamer gevul met reuse ballonne bevind
terwyl ek sukkel om die skouspel voor my in te neem

op elke ballon is daar ‘n inskripsie wat sê
waarmee dit gevul is
en ek gebruik my tyd om elke inskripsie te
lees
liefde, geduld, passie, respek, dankbaarheid
en vele meer

ure later staan ek voor ‘n veel kleiner deur en
trek dit baie versigtig oop
die kamer is kleiner en donkerder en met
kleiner ballonne gevul
haat, rusie, jaloesie, misdaad, korrupsie en
ander

wanneer ‘n ballon bars, vloei die inhoud
daarvan deur die oë na buite
waar dit deur ander lewens om ons se oë
opgeneem word om ’n nuwe ballon met dieselfde inhoud te vorm

ek stap deur ‘n lang rooi tonnel tot voor ‘n
groter liggrys deur
die deur swaai vanself oop en ek staan voor
‘n lang gang
waaruit ‘n menigte ander gange ontspring

aan weerskante van die gange is daar patryspoorte in die gangwande
waardeur ek na verskillende tydperke van my lewe kyk
hierdie tydperke strek van ure tot selfs jare
bang vir dit wat ek daar sal sien
beweeg ek van poort na poort
waar elke tydperk soos ‘n rolprent voor my
ontvou

daar was kleurvolle tydperke van ontdek en
leer en geluk
terwyl die na-oorlogse wêreld weer herbou moes word
en mense daagliks skouer aan skouer
daaraan kon werk

dan was daar ook poorte met donker
tydperke
wat trane oor my wange laat rol het
as gevolg van die seer wat ek veroorsaak het

tydperke waar my woorde baie diep gesny
het
en my dade tydrowende konflikte veroorsaak
het
wat die wêreld om my gevaarlik weggekalwer het

ek is baie jammer dat ek hierdie reis nie jare
gelede reeds onderneem het nie
want die ontdekking wat ek op hierdie reis gemaak
het
het my lewe onherroeplik verander

Prosa & poësie | 0 kommentare

u was altyd daar

Wo, 10 Augustus 2022 21:17

toe ek as pasgebore baba my oë oopmaak
was u daar
om my in u arms toe te vou en te koester
en my daaglks deur my babajare te help

toe ek as handvol kleuter begin om dinge te ontdek
was u daar
om my aan die hand te neem
en my van ‘reg’ en ‘verkeerd’ te leer

toe ek as nuuskierige knaap sonder einde vrae vra
was u daar
om my vrae te luister
en my elkeen met baie geduld te antwoord en verduidelik

toe ek as trotse skoolseun die leerwêreld betree
was u daar
om my daagliks te ondersteun
en my te help om my kennis te verbreed

toe ek as jong seun stout dinge aanvang
was u daar
om my storie te luister
en my die verdiende straf te gee

toe ek as onseker troepie op die trein klim
was u daar
om my styf vas te hou
en my sterkte en liefde toe te wens

toe ek as jong man begin te werk
was u daar
om my gereeld te ondersteun
en my u kennis te deel

toe ek as volwasse mens my eie pad inslaan
was u daar
om my te sê dat u verstaan
en my teen moontlike gevare te waarsku

nou dat ek as ou man voor u staan
is u daar
om my en my gesin se gelukwensing te ontvang
met u 100ste verjaardag

Prosa & poësie | 0 kommentare

vryheid

Wo, 10 Augustus 2022 21:16

vryheid
dit is die wens van elke mens op hierdie planeet
om vry te wees van die hoë eise wat ander van ons vra
die vriendekring, die skool, die ouerhuis, die regering
want om aan elkeen se eise te voldoen
gaan daar net nie genoeg tyd oor wees
om werklik jouself te wees nie

terwyl ons onbewustelik ook ons eie eise aan ander stel

om werklik vry te wees
is ‘n gawe
wat benut moet word
deur ander te dien
sonder om jouself prys te gee

om werklik vry te wees
is geen reg
geen sleutel wat die deur na misdaad oopsluit
om ander te besteel, te verkrag, te vermoor
sonder om daarvoor te boet nie

vryheid
‘n eenvoudige woord
wat op sy tyd oor elke mens se lippe kom
en diep in die hart gesmag na word

vryheid
‘n baie moeilike woord om te verstaan
weens die betekenisse
wat mense daaraan heg

Prosa & poësie | 0 kommentare

die liefde 2

Wo, 10 Augustus 2022 21:14

ek lees in Die Bybel dat selfs wanneer alles vergaan
die liefde vir ewig sal bly bestaan

ek lees verder dat alles wat sonder liefde gedoen word
sal faal en oor die afgrond sal stort

ek lees ook dat ons mekaar elke dag lief moet hê
omdat ons nie weet wanneer ons in die graf sal lê

dan vra ek myself die mees gevraagde vraag
wat is hierdie liefde waaroor almal waag
om te dig en te skryf en te sing
hierdie iets wat ewe veel lag as trane bring

is dit die iets waarmee die mier sy eier na ‘n nuwe nes toe dra
en die leeu storm wanneer iemand haar welpies pla
die hond stertswaaiend sy huismense groet
en die arend na kilometers se vlieg haar kuiken voed

as die liefde dan daardie iets is waarmee al hierdie dinge gebeur
waarom laat dit dan die lewe van soveel mense uitmekaar uit skeur

Prosa & poësie | 0 kommentare

Bladsye (1842): [ «    6  7  8  9  10  11  12  13  14  15  16  17  18  19  20  21    »]
Tyd nou: So Jul 14 17:50:26 MGT 2024