'n uur in my lewe
So, 28 Augustus 2022 09:05
ek sit hier met potlood in die hand
proberend om ‘n gedig te skryf
buite is die wêreld aan die brand
iewers blêr musiek op ‘n kompakskyf
een vir een ontstaan die woorde op die papier
soos die potlood grasieus deur sy danspassies gaan
op ‘n tuinstoel neem my buurman groot slukke bier
‘n mossiemannetjie drink water onder die kraan
woorde word sinne
wat op hul beurt weer verse word
iemand speel op die klavier hier binne
Nushka, ons worshond, lek die rys uit sy bord
lyn vir lyn word die gedig al hoe langer
terwyl die potlood se punt vinnig verpoeier
op die kompakskyf sing daar ‘n country-sanger
my buurman was glo destyds ‘n vername roeier
dis ‘n gedig oor ‘n uur in my lewe
die potlood is nou heeltemaal klaar
op die wekker is dit reeds kwart oor sewe
ek is vir nog ‘n dag uitgespaar
Prosa & poësie |
0 kommentare
die winkelgang
So, 28 Augustus 2022 09:03
ek sit nie so lank gelede in ‘n gang
wat hom deur ‘n winkelsentrum slang
om ‘n bietjie te rus
terwyl my vrou die tjekboek sus
dis ‘n besige dag
mense wat koop en mense wat wag
trollies wat bots
en babas wat kots
ma’s wat roep
en ou ooms wat poep
ligte wat flikker
soos advertensies jou probeer opkikker
mense wat kom en gaan
stamp mekaar soms uit hul baan
maar eintlik is dit ‘n triestige dag
want mense weet skynbaar nie meer hoe om te lag
nêrens is daar ‘n glimlag op ‘n gesig
eerder ‘n blik van las en gewig
Prosa & poësie |
0 kommentare
Baie dankie Gesellig
Net 'n vraag; Do, 25 Augustus 2022 12:10
Baie dankie vir ‘n netjies uitgelêde en gebruikervriendelike webtuiste in Afrikaans.
Daar is egter iets wat my pla en wat werklik jammer is.
Wanneer ek na die lys van lede kyk, sien ek dat daar gereeld nuwe lede aansluit, wat verblydend is en waarvoor ‘n mens dankbaar is, maar onder “Boodskappe Bygevoeg” sien ek geen beweging nie. Ek kan nie glo dat daar soveel lede op die tuiste is, maar dat daar geen aktiewe byvoegings verskyn nie.
Ek besef dat nie elke nuwe lid ‘n digter is nie, maar ek is nie die enigste Afrikaanse digter in ons land nie. Hoekom verskyn slegs my gedigte op die tuiste? Ek kla nie, want ek sien dit word gelees en daarvoor is ek baie dankbaar, want selfs as slegs een van my gedigte vir iemand daarbuite iets positiefs kan beteken, sal dit my die gelukkigste mens maak. Dit is al wat ek wil bereik. Ek wonder net waar al die ander digters hulle gedigte plaas. Voor 2017 was Woes.co.za die plek, maar nou is dit nie meer daar nie.
Alle voorsped met Gesellig.
Kennisgewings |
3 kommentare
om werklik te luister
Do, 25 Augustus 2022 11:43
om werklik te luister
is om stil te raak
so stil
dat jy die goggas kan hoor fluister
die mier wat oor ‘n grashalm loop
en ‘n stokkie na sy nes toe sleep
of die skoenlapper wat met klappende vlerke
van struik tot struik beweeg
om te hoor wanneer die natuur fluister
is wanneer jy werklik luister
want dan hoor jy slegs die Skepping se klank
Prosa & poësie |
0 kommentare
die monster
Do, 25 Augustus 2022 11:42
julle moet versigtig loop alle mense
want hier is ‘n monster tussen ons
sy wreedheid ken geen grense
en laat alle kommunikasielyne gons
anders as die dier wat slegs doodmaak om te eet
of sy gebied en gesin te beskerm
hou hierdie monster aan met vreet
sonder om hom oor enigiets te ontferm
selfs nie die insek of reptiel
sal doodmaak vir genot
maar hierdie monster verniel
ongeag die Wil van God
hy kamoefleer homself in die menslike liggaam
sodat hy onsigbaar tussen ons kan beweeg
terwyl hy sonder om hom te skaam
die lewe uit sy prooi uit veeg
sy prooi is onskuldige meisies
wat spontaan die lewe geniet
want hierdie monster verkies
om spontaniteit te omskep in verdriet
Prosa & poësie |
0 kommentare
storms
Do, 18 Augustus 2022 15:50
buite is ‘n storm besig om homself uit te woed
van die kleinste plantjie tot die grootste boom
moet verbete vasklou om nie ontwortel te raak
deur ‘n wind wat alles wat in sy pad kom mee wil sleur
om dit dan ‘n ent verder verpletter agter te laat
waar bruisende modderwater deur die reën veroorsaak
dit sal optel en iewers teen ‘n muur of boomstam gaan vasspoel
of dit dobberend sal laat ronddrywe in ‘n oorstroomde straat of erf
terwyl halfbevrore mens en dier ‘n droë plekkie soek
om van die allesvernietigende natuurwoede te ontvlug
binne is ‘n ander storm ook besig om homself uit te woed
van die kleinste gedagtetjie tot die grootste droom
moet onverskrokke baklei om nie afgebreek te word
deur ‘n vraagoseaan wat alle positiwiteit uitmekaar wil skeur
om dit dan met negatiwiteit en onsekerheid te vervang
totdat dit die ganse breinstelsel en elke hartkamer oorstroom
van waar dit elke uithoek van die liggaam bereik
en normale spierbeweging in chaos omskep
terwyl ek met my laaste krag hard daarteen stry
om nie antwoorde op hierdie see van vrae te probeer kry
maar om my sig op U gevestig te hou
omdat slegs U die antwoorde ken
en U hulle op U tyd aan my bekend sal maak
Prosa & poësie |
0 kommentare
oorlogskloof
Do, 18 Augustus 2022 15:49
soos 'n fetus
snoesig genestel in die baarmoeder van vroue
so ook lê jy
veilig en rustig
in een van swartberg se voue
hulle noem jou oorlogskloof
maar ek dink nie hul't besef
hoeveel liefde en geloof
jou kinders by jou sal leer
ja, liefde vir mekaar
en ook vir die natuur
vir stroom, krans, plant en dier
net liefde elke uur
met jou naaste dorp klaarstroom
en ver weg van hoofpaaie
word stadsgeraas slegs 'n droom
wat vir ewig droom sal bly
geluide wat jy hoor
kom elk uit die natuur
van plant, dier, voël en mens
wat leef uit hierdie spens
anders as die fetus
wat uit die baarmoeder ontvou
bly jy immer rustig
in swartberg se vou
en altyd aan die natuur getrou
Prosa & poësie |
0 kommentare
langs die graf van my land
Do, 18 Augustus 2022 15:47
nee, Here, ek is nie gegradeerd
of andersins hoogs geleerd
dit klink seker baie siek
want ek het maar net matriek
nogtans kan ek sien
dat geen mens die wreedheid verdien
wat daagliks
so uiters aagliks
deel van ons lewe geword het nie
maar ek wil nie verder kla
ek wil U eerder vra
om ‘n einde aan hierdie misdaad te maak
en die wrede moorde en verkragtings te laat staak
sodat ons U weer met sang kan prys
Prosa & poësie |
0 kommentare
onkruid in my tuin
Do, 18 Augustus 2022 15:45
die winterson skyn weer
na ‘n paar dae van aanhoudende reën
en ek moet my na die beddings keer
om enige winterskade te herstel
ons inwonende kruipmol
het uit sy somerslaap ontwaak
en begin om die ganse tuin om te dol
op soek na iets wat sy maag kan vul
miljoene ontkiemende saadjies
breek die grond op soek na die hitte van die son
maar hulle is nie almal maatjies
en dit is waar die werklikheid my tref
party van hierdie plantjies is tuinplante
en baie ander is onkruid
maar al beskou ek hierdie idee van alle kante
is ek nie meer so seker oor wat moet bly en wat moet uit
want watter van hierdie plantjies is werklik onkruid
elkeen van hulle is immers deel van God se Skepping
so waarom moet die een dan bly en die ander uit
ek weet nie regtig nie en dit is my erkenning
dan verskyn die Skeppingsbeeld weer voor my
en besef ek dat God wou hê dat alle lewens in harmonie moes verkeer
daarom is daar nie werklik iets soos onkruid te kry
want dit is bloot ‘n idee wat in ons breins floreer
‘n onkruid is bloot daardie plantjie
wat op so ’n plek in ‘n bedding staan
waar ons dit nie kan toelaat om te groei
en wat daarom moet verwyder word daarvandaan
Prosa & poësie |
0 kommentare
14 jaar van demokrasie
Do, 18 Augustus 2022 15:44
nagswart wolkreuse is besig om saam te pak
(soos swartgetooide bestuurslede wat vir ‘n vergadering opdaag)
en blaarbelaaide boomtakke word woes rondgepluk
(soos drenkelingarms wat om hulp roep)
kamertemperatuur van net deuskant vriespunt
werk hard aan die verlaging van liggaamstemperatuur
terwyl dooie vingerpunte (nee, hulle lewe nog, want hulle pyn)
sukkel om die dinge waarheen bibberende arms hulle uitstoot raak te vat
en gevoellose voete kan nie meer krampende bene help
om die foddegeklede liggaam vorentoe te dra nie
na daar waar die swart ysterpot wydsbeen oor die binnenshuisvuurtjie staan
sodat water vir die gesin se aandete van mieliepap gekook kan word
Prosa & poësie |
0 kommentare
Supertaal
Blog
Soek
Hulp
Lede
Registreer
Teken aan
Tuis
RSS
