heroldsbaai
Sa, 03 September 2022 07:27
‘n traan van verlange rol oor my wang
as ek terugdink na die dae van ons jeug
toe ons lewens gevul was met voëlgesang
en alles wat ons doen was voortgebring uit vreug’
ek, die sproetgesig seuntjie
wat skulpe optel op die sand
en jy, die besige strandjie met die deuntjie
wat die skulpe weer wegraap voor my hand
ek was toe nog jonk en ongebonde
ek het graag in jou waters geswem
jy was rein en ongeskonde
en ek het geglo dat hul jou nooit sal tem
ek het so baie oor jou hangbruggies gehuppel
om jou pragtige natuurskoon te bewonder
en jy het so hard gesukkel
om my by te kom van daar onder
maar ek kan maar vir jou sê
ek was altyd ‘n bietjie vir jou bang
want daar is vele wat iewers lê
soos jy hulle elke jaar kom vang
elektrisiteit het jy toe nog nie geglo
en water was te koop by die kraan op die hoek
nuwe vriende het jy gereeld gewen
want almal het na jou skoonheid kom soek
maar nou het ons altwee veel ouer geword
jy het reeds lankal gebars uit jou nate
en ek begin sukkel om my broek te omgord
jou heuwels is geskend deur die grondmagnate
op die foto’s wat ek saamdra in my brein
en waardeur ek nog gedurig blaai
is jy steeds nog my strandjie klein
my pragtige, jeugdige heroldsbaai
Prosa & poësie |
0 kommentare
hallo, pa
Sa, 03 September 2022 07:26
hallo, pa
ek verlang na die pa-en-seun-dae
wat ek in al my vyftig jaar
nooit die voorreg kon hê om te ervaar
nooit kon ek vir pa sê
dat ek graag in jou arms wou lê
nooit het ek die kans gekry
om op jou nek te ry
nooit kon ek jou uitvra
oor die dinge wat my pla
nooit kon ons speel met ‘n bal
of jy my weer optel elke keer as ek val
nooit kon jy met my stories deel
uit jare reeds lankal vergeel
nooit kon jy my straf
wanneer ek van die lewenspad af draf
nooit kon ek vir jou sê
dat ek jou vir altyd lief sou hê
ja, pa
daar was menige dae
wanneer ek vir jou baie kwaad was
omdat jy so sonder my verkas
want ek kon nie verstaan
waarom jy weg moes gaan
vandag verstaan ek
maar dit maak steeds nie op vir die gebrek
om groot te word sonder ‘n pa
ja, daar is ma
en ek is baie trots op haar
want ek dink sy het besonder goed gevaar
maar sy is nie ‘n man
en daar is dinge wat net ons mans kan
maar pa
ek kan darem “baie dankie” sê, o ja
baie dankie vir die meisie wat pa as vrou
geneem het om mee te trou
baie dankie vir elke gene en karaktertrek van pa
wat saam met díé van ma
gehelp het om van my ek te maak
ek glo dat pa ook op die resultaat trots sou raak
Prosa & poësie |
0 kommentare
hoe sê mens dankie
Sa, 03 September 2022 07:24
hoe sê mens dankie vir ‘n leeftyd
‘n leeftyd van na-oorlogse swaarkry
met vyf honger magies om te vul
‘n leeftyd van afskeid by ‘n ope graf
van waarom-vrae en weerbegin
soms sê die woordjie “dankie” net te min
hoe sê mens dankie vir ‘n leeftyd
‘n leeftyd van liefde vir plant en dier
waar die mens deel vorm van die natuur
‘n leeftyd van skeppende kuns en musiek
talentontgunning van elke kind
genoeg dankie-woorde kan mens skaars vind
hoe sê mens dankie vir ‘n leeftyd
‘n leeftyd van verkeerdom-politiek
waar nat en sap droër is as kurk
‘n leeftyd van omgekeerde politiek
die regering is nie meer blank nie
moeder, ek sê: “baie, baie dankie!”
Prosa & poësie |
0 kommentare
God se Tempel
Vr, 02 September 2022 16:01
ek het my rug onbewustelik beseer
terwyl ek besig was om my dagtaak uit te voer
aanvankllik was daar ‘n ongemaklike gevoel iewers doer
maar ek was te besig
en het my rug op die ongemak gekeer
ure het dae geword en die ongemak het elke keer
meer stukrag teen my dagtaak ingevoer
totdat algehele nutteloosheid vir my kom loer
en ek besef het
dat ek moet praat met my Heer
want slegs Hy kan die ongemak afweer
wat tans besig is om my werwels deurmekaar te roer
sodat ek geen breininstruksie meer uit kan voer
slegs Hy het die mag
om die groei van hierdie ongemak te keer
hieruit het ek die wonderlike lewensles geleer
dat afgesien van die ongemak wat vir my loer
daar ’n baie sterker Hand is aan diie roer
omdat my liggaam sy Tempel is
en ek daardie feit nooit mag ignoreer
Prosa & poësie |
0 kommentare
jeuglose land
Vr, 02 September 2022 15:29
vir wat soos ‘n ewigheid voel sit ek en staar
na die sneeuwit komperskerm hier regvoor my
want die duisende vrae in my brein lê baie swaar
maar die antwoorde daarop bly my vermy
hoeveel jong lewens moet hierdie land nog verloor
voordat die regering sal besef
dat hulle tans die leiers van môre vermoor
hul vingermerke lê op elke moordenaarsmes se hef
hulle laat toe dat misdadigers steel en moor en verkrag
as ‘n danksegging vir hul lojale stem
terwyl die meeste mense in die land na vrede en liefde smag
en wens dat die regering die misdadigers sal tem
indien die regering lank genoeg aan bewind kon bly
sou daar niemand meer wees om vir hulle te stem
want die jeug van vandag is die stemmers wat jy môre kry
maar in ‘n jeuglose land is daar niemand wat kan stem
Prosa & poësie |
0 kommentare
platinumtoets
Vr, 02 September 2022 13:12
na ‘n dienstermyn van meer as drie dekades
word die tapyt onder my voete uitgepluk
tydens ‘n voorafbeplande dissiplinêre verhoor
vir meer as ‘n jaar tuimel ek daagliks dieper
in ‘n bodemlose put gevul met vrae
en gevoelens van haat en mismoed en wrok
tog hou U u Hande tussen my vallende lyf
en die skerp punte van die ruwe putwand
of verminder U die spoed van my val
my gees vlieg oor berge en valleie van emosies
en die burgeroorlog in my brein
sorg dat verkeerde seine na die liggaamsdele gaan
dan skakel U ‘n oproep na my selfoon deur
en vra of ek graag weer ‘n inkomste wil verdien
ek hoef slegs ja of nee te sê
stomgeslaan van skok sê ek toe ja
en betree weer die wêreld van die werkende man
waar ‘n beter paket as ooit tevore op my wag
‘n paar weke later plaas U my voor die platinumtoets
toe U die deur vir die tapytuitplukker open
om as ‘n kollega saam met my te kom werk
Prosa & poësie |
0 kommentare
sedoos
Do, 01 September 2022 16:44
suidoostewind kaapse dokter suidoos sedoos
ek glo daar is nog vele ander name op jou pasboek gedruk
party heel beskrywend en ander minder so
want vir vele is jy dit waarna hulle uitsien
wanneer die somer met sy hittegolwe nader skuif
en die lug van bose kieme gereinig moet word
of om te help met die opruim van papier- en plastiese sakke
terwyl net soveel ander se bloed begin bruis
oor al die stof wat by elke opening ingeforseer word
en die plante wat geskroei word ten spyte van al die water wat hulle kry
of dit nou uit liefde is of uit haat
wees verseker dat jou naam op die tong
van elke mens wat die kaap besoek rol
want sonder jou is die kaap net nie moontlik nie
Prosa & poësie |
0 kommentare
op die dak van die aarde
Do, 01 September 2022 16:08
inuit
‘n sagte naam
vir ‘n warm volk
met ‘n harde lewe
in ‘n koue land
inuktitut
‘n mooi naam
vir ‘n vreemde taal
van ‘n ryke volk
in ‘n arm land
nunawut
‘n pragtige naam
vir ‘n wrede land
van ‘n lewendige volk
in ‘n sprokieswêreld
Prosa & poësie |
0 kommentare
wintersdag
Wo, 31 Augustus 2022 10:49
dit is tienuur in die oggend
in die kaggel brand die vuur
terwyl die pot stampmielies op die stoof byna kook
intussen word die boontjies op die kombuistafel gesorteer
sodat net die mooi vettes in die soppot sal beland
water val uit die lug asof reuse sluise oopgetrek is
in die sitkamer lê die honde vlak voor die kaggel
nou is die son reeds vier dae lank weg
terwyl blitse en donder sorg vir ‘n onaardse simfonie
en ek en jy en die dogters bibberend
reg langs die honde ons plekke inneem
Prosa & poësie |
0 kommentare
taalspier
Wo, 31 Augustus 2022 10:48
jy is hard, jy is sag
maak my huil, maak my lag
terwyl jy die taal elke dag
beskerm met al jou mag
jy is skepper van spraak
jy kan mense vermaak
terwyl jy die klanke uitbraak
wat jy in monde maak
jy gee kleur aan 'n taal
want jy maak dit verbaal
terwyl jy die klanke fynmaal
van jou lewensverhaal
jy gee vorm aan 'n woord
jy leer my die akkoord
terwyl die verhaal van die moord
op my taal nou verwoord
jy moet 'seblieftog keer
dat hul my taal beseer
terwyl hulle jou meer en meer
van buite wil beheer
jy's my enigste troos
want ek weet jy word boos
terwyl jy sukkel met jou kroos
van noord, suid, wes tot oos
jy's geen plant, jy's geen dier
jy verskaf my plesier
terwyl ek ontspan met 'n bier
jy's my tong, my taalspier
Prosa & poësie |
0 kommentare
Supertaal
Blog
Soek
Hulp
Lede
Registreer
Teken aan
Tuis
RSS
