winterreën
Wo, 31 Augustus 2022 10:05
ons word werklik geseën
met die val van hierdie laat winterreën
die mense weet nie meer waarheen
die diere is net vel en been
die plante staan versteen
alles weens die gebrek aan die winterreën
die water op die vloer klop aan die man se skeen
mens en dier en plant is weer op die been
en van droogtesprake is daar geen
alles te danke aan die welkome winterreën
Prosa & poësie |
0 kommentare
winter in die kaap
Wo, 31 Augustus 2022 10:03
wat het van die son geword
hy het ses dae gelede nog geskyn
maar toe het daar baie wolke gekom
en nou het die son vir goed verdwyn
ek en die honde is allenig hier
in die skemer huis
en al het ons elke vertrek se ruimte
voel dit of ons opgesluit is in ‘n kluis
want buite val die water
in meer liters as gellings
soos hemelse riviere
uit oupa se vertellings
‘n winter met ag dae se reën
het hy altyd van gepraat
as die tyd wanneer water en hael en sneeu
die son die hemelruim laat verlaat
Prosa & poësie |
0 kommentare
woorde
Wo, 31 Augustus 2022 10:02
soveel tale, soveel woorde
soveel klanke, soveel akkoorde
ek wonder hoeveel woorde daar werklik bestaan
en waar kom al hierdie woorde oorspronklik vandaan
daar is oues en nuwes
kortes en langes
mooies en lelikes
en maklikes en moeilikes
om die korrekte uit die lys van woorde te vind
is geen geringe taak, onthou
want daar is ook nog spelling en uitspraak
om mee rekening te hou
Prosa & poësie |
0 kommentare
trane uit die lug
Di, 30 Augustus 2022 19:18
yskoud sit ek voor die venster
met ‘n lied in my hart
want die droogte is gebreek
die reën bring ‘n einde aan die smart
daar is weer hoop vir die komende somer
soos stroompies bruisende riviere word
om hul vrag lewensvog vir mens, plant en dier
in lankvergete damme te stort
terwyl ek so na die druppels kyk
verander hulle in miljoene trane van Bo
wat op ons land gestort word
deur onsigbare huilende oë
wat almal neerkyk op die misdaad en geweld
diefstal, inbraak, verkragting en moord
korrupsie, aanranding en wetteloosheid
is dade wat ons daagliks ervaar sonder ‘n woord
Prosa & poësie |
0 kommentare
hoekom ek my God
Di, 30 Augustus 2022 19:16
hoekom ek my God
U het my onwetend
vir soveel jare uitgespaar
om na my gesin om te sien
en te ervaar hoe my pragtige dogters volwassenes word
terwyl ek saam met my ewe pragtige vrou na die daaglikse sonsondergang mag kyk
ek het so baie foute
en het U al soveel kere in die steek gelaat
ek het al baie die verkeerde voetpad vanuit U lewenspad geneem
maar U het vir my kom kies
wat kan ek doen om U te bedank
want in enige taal klink "baie dankie" ook maar net soveel
hoewel ons baie meer daarmee wil sê
gebruik my waar U my mag nodig hê om U werk hier op aarde te doen
Prosa & poësie |
0 kommentare
om 'n gedig te skryf
Di, 30 Augustus 2022 19:15
om ‘n gedig te skryf
is om ‘n emosie in jou hart te hê
daardie emosie in woorde op papier neer te lê
op so ‘n manier dat baie min woorde vreeslik baie sê
Prosa & poësie |
0 kommentare
in die hart van die afrikaner
Di, 30 Augustus 2022 13:46
gebore uit die stof van afrika
selfs vernoem na hierdie magtige vasteland
met lewende verwantskappe in europa
en ‘n kort geskiedenis uit asië
is afrikaans - my moedertaal
die enigste taal wat na ‘n vasteland vernoem is
‘n vasteland wat haar nie wil hê nie
maar haar soete klanke
weerklink reeds ver buite die grense van hierdie landmassa
dit is afrikaans - my moedertaal
om braaivleisvure en kombuistafels word stories vertel
in raadsale en kantore word debatte gevoer
op verhoë en straathoeke word liedjies gesing
en interessante toneelstukke opgevoer
in afrikaans - my moedertaal
die regering probeer regverdig
elke aanslag wat hulle voer
in staatskantore en aanklaglokale
en skole en hofsale
teen afrikaans - my moedertaal
gevul met die metafoor van hierdie pragtige taal
stap ons daagliks onder die afrika-son
om versoening en eenheid te bring
op ‘n vasteland vasgevang in rewolusie
deur afrikaans - my moedertaal
Prosa & poësie |
0 kommentare
grade van eensaamheid
Di, 30 Augustus 2022 13:15
om in die middel van die oseaan
te smag na ‘n druppel water om te drink
is eensaam
om in die middel van die woestyn
te smag na ‘n skaduwee om in te rus
is net so eensaam
om in die middel van die gletser
te smag na ‘n skerm om agter te skuil
is selfs meer eensaam
om in die middel van die wêreldstad
te smag na iemand om na jou storie te luister
in absolute hel
Prosa & poësie |
0 kommentare
engeleblik
Di, 30 Augustus 2022 13:14
soos ‘n verwoede dinosaurus wat afstorm op sy prooi
rol die ystervoël met my in sy maag oor die hoofpad na nêrens
om my later, asof op arendsvlerke, hoër en hoër en hoër te neem
van waar ek deur een van sy sweetgaatjies
‘n engeleblik op die Skepping kan kry
Prosa & poësie |
0 kommentare
'n kindergebedjie
Ma, 29 Augustus 2022 19:35
ek sê my aandgebedjie
op my knietjies
langs my wagtende bedjie
ek vertel vir Liewe Jesus daarbo
hoe grootmense met ons kleintjies baklei
en vra vir Hom hoekom is dit so
ek het gedink dat hulle ons altyd lief sal hê
en vir ons sal leer om ook eendag grootmense te wees
want dit is wat hulle gedurig vir ons sê
ek vra vir Hom om met ons kleintjies te wees
en ons teen die grootmense te beskerm
en dat Hy ook hulle bakleisiekte moet genees
ek vertel vir Hom dat ek in my Kinderbybeltjie sien
dat Hy baie lief vir kindertjies is
omdat dit liefde is wat kindertjies verdien
ek bedank Hom vir my mamma en pappa en asem
want daar is baie kindertjies wat nie so iets het nie
en dan sê ek vir Hom amen
Prosa & poësie |
0 kommentare
Supertaal
Blog
Soek
Hulp
Lede
Registreer
Teken aan
Tuis
RSS
