Radiospeler Radiospeler
 
Supertaal
Kom praat saam!

Wys: Vandag se boodskappe :: Onbeantwoorde boodskappe :: Stemmings :: Navigasie
Hartlik welkom! Op hierdie webtuiste kan Afrikaanse mense lekker in hul eie taal kuier, lag en gesellig verkeer. Hier help ons mekaar, komplimenteer mekaar, trek mekaar se siele uit, vertel grappe en vang allerhande manewales aan. Lees asb ons aanhef en huisreëls om op dreef te kom.

dis lente

Di, 27 September 2022 07:55

na byna drie weke van onophoudelike reën
met strate, erwe en wonings oorstroom deur water
en ‘n yswind wat deurdring tot op die been
kom die stem oor die radio met voorspellings van
reën, reën, sneeu, koue en reën

maar vandag is die plate water
die enigste teken van al die reën
want die son het deur die wolke gebreek
plante ontvou hul blomme
en voëltjies kwetter weer luidrugtig in die bome
want dis lente

Prosa & poësie | 0 kommentare

ek het nie woorde nie

So, 25 September 2022 09:51

nog nooit in my lewe
het ek so ‘n verskeidenheid emosies ervaar
soos tydens die vorige sewe
nee, ag maande van hierdie jaar

eers was daar die skok soos ‘n hirosjima-ontploffing
gevolg deur uiterste ongeloof soos tydens 9/11
toe kom die miljoene vrae aangerol soos tsunami-golwe
terwyl rou haat wou ontplof soos ‘n palestynse selfmoordbomdraer
later is die skok en ongeloof deur woede vervang soos by ons misdaadslagoffers

ure dae weke maande
was gevul met vrae en woede en haat
en ‘n desperate soeke na sinvolle antwoorde
vir die immergroeiende tsunami van vrae
wat dag en nag steeds heftiger geword het

ek het geglo dat ek deur hierdie storm sou kom
want ek was nog altyd in beheer gewees
en buitendien moes ek vir my gesin sterk staan
sodat hulle steeds met hulle daaglikse lewe voort kon gaan
omdat ek hulle nie deur hierdie storm wou sien gaan nie

maar ek kon nie die verpletterende aanslae van die storm alleen hanteer nie
en het dringend hulp nodig gehad om staande te bly
uiteindelik kon en nie meer staande bly nie en is op my knieë gedwing
‘n tsunami-vloed van gebede is opgestuur
party grammatikaal korrek en ander slegs ‘n warboel woorde

die vrae en woede en haat was steeds daar
maar dit het gevoel asof dit sagter word
en ‘n kalmte het oor my hele wese gekom
dit was die wonderlikste emosie
wat ek in jare ervaar het

ek het besef dat U al die tyd by my was
U het van elke emosie geweet
en na elke gebed geluister
al het ek party gebede hardop gesê en ander gefluister
U het my snoesig toegewikkel in u Beskermende Jas
mag ek hierdie daad nooit vergeet

Prosa & poësie | 0 kommentare

die woordeboek

Di, 20 September 2022 12:20

gduldig het my ours my vn spelng gleer
om my vri skol greed te kry
war anr oms n tanis
soms mt bai ongduld
my di blangrikyt davn sou leer

ekt gleer hoe ome woreboek te lees
n di regte word wat ksoek te vnd
net om sekr tmak
dat di spelng vni word
di korekte en sou wees

mar net toek elke word korek ko spel
word di werld ine rewlusi gdompl
medi koms vni klyne selfon
warmek tekse n briwe kan stur
na elke famlilid n pel

onglukig isi stur davani vnit
ntendeel dis bai bai dur
darom moetek vn spelng vrget
anrs sali smse
my bai gou los sonr enige krdit

nou wonrek wasi nut vni woreboek
wani selfont my talvryhyt ggee
ekt nou bsef ekt sovl tyd gmors
omi korekte spelng vne word
in dari reuse boek te soek

Prosa & poësie | 2 kommentare

drie gesigte van eensaamheid

Di, 20 September 2022 12:18

mensalleen stap jy oor die yskontinent se vlaktes
terwyl vallende sneeuflokkies ru teen jou baard vasgekoek word
deur ‘n stormwind wat enige ysberg sal versuif
die enigste geluid is die onaardse gesuis van die wind
en die af-en-toe se geskeur van krakende ys

allenig stap jy oor die veld van die groot karoo
terwyl die son se strale ongenaakbaar op jou vel inbrand
en ‘n warrelwind al dansende in die verte verbybeweeg
die enigste geluid kom van jou asemhaling, jou hartklop, die bloed in jou are
en die af-en-toe se gefluit van ‘n voël

stoksielalleen stap jy in die hoofstraat van die wêreldstad
versigtig om nie deur die mensemassa vertrap te word
of tussen verbyflitsende voertuie te beland nie
die enigste geluid is ‘n mengsel van die onnatuurlike geraas van voertuig en mens
en die af-en-toe se geblaf van ‘n hond

Prosa & poësie | 0 kommentare

die ding met die grootste mag

Di, 20 September 2022 12:17

deur woord en daad
kan jy ander baie skaad
dog, as jy goed daarna kyk
kan jy selfs hul lewens verryk
maar die ding met die grootste mag
bly steeds die spontane glimlag
gee dit aan ‘n ander
en kyk hoe dit hul voorkoms verander

Prosa & poësie | 0 kommentare

die geboorte van 'n eeu

Di, 20 September 2022 11:17

dit is nie vir almal beskore
om te sien hoe word ‘n eeu gebore
en daarom wil ek graag dankie sê
om so ‘n voorreg te mag hê
want hierdie eeu is spesiaal
die jaartal begin met tweeduisend vir die eerste maal

Prosa & poësie | 0 kommentare

by die sterfbed van 'n eeu

Di, 20 September 2022 11:15

ons staan by die sterfbed van ‘n eeu
en kyk terug oor die hoogtepunte van sy lewe
daar sien ons twee wêreldoorloë, kommunisme, depressie
elektroniese vooruitgang, ruimtereise, apartheid
menseslagtings, sedeloosheid en die komper

daarom sê ons “dankie” aan ‘n wonderlike eeu
‘n eeu van liefde
‘n eeu van leed
‘n eeu van weerbegin

Prosa & poësie | 0 kommentare

bleekgesig uit die noorde

Di, 20 September 2022 11:13

met net die lied van die wind
oor die groot oseaan
kom jy hier met jou vrou en kind
vanuit die noorde aan
styf toegedraai in die vel
van 'n snaakse soort dier
wat seker leef in die hel
want ons ken hom nie hier

jy sê ons hoef nie te vrees
want jy kom in vrede
dankbaar om nou hier te wees
ver weg van die wrede
mense in jou noorderland
jy gaan ook nou hier woon
hier in ons pragtige land
met sy mooi natuurskoon

die wiel help jou om vinnig
'n afstand af te lê
maar is dit wat ons innig
hier in ons land wil hê
jy maak lang stroke veld oop
waar jy jou wiel wil rol
stroke waar die diere loop
jou wiel maak grafte vol

jy leer ons met draad te werk
soos jy ons veld afkamp
dis dan glo jou plaas se merk
vir ons is dit 'n ramp
jou draad maak ons diere seer
ons kan nie meer daar loop
jy begin ons land beheer
jaag ons nou op 'n hoop

byl en saag begin nou praat
waar jy ons woude kap
vir ons voëls is dit te laat
waar jou byl neste hap
ook die diere begin trek
hul voel nie meer veilig
hul soek nou 'n ander plek
hul oerwoud was heilig

jou donderpyp kry sy beurt
om diere af te maai
dit laat ons mense verskeurd
soos dit die dood nou saai
daar kom nou nog meer van jou
ons word jou pyp se prooi
jy vat ons dogters as vrou
ons land is nie meer mooi
bleekgesig van die noorde
besef jy wat jy maak
jy weet nie hoeveel moorde
hoeveel wreedheid jy braak
regoor ons dierbaar aarde
wat het verkeerd geloop
niks het meer vir jou waarde
soos jy die aarde sloop

Prosa & poësie | 0 kommentare

"Ek herhaal jou" deur INGRID JONKER

Ma, 19 September 2022 20:59

Ek herhaal jou
sonder begin of einde
herhaal ek jou liggaam
Die dag het 'n smal skadu
en die nag geel kruise
die landskap is sonder aansien
en die mense 'n ry kerse
terwyl ek jou herhaal
met my borste
wat die holtes van jou hand namaak

- Ingrid Jonker

Prosa & poësie | 1 kommentaar

'n duisend dankies, Heer

So, 18 September 2022 13:21

U het my nog ‘n kans in die beroepslewe gegee
waar ek elke dag die gawes wat U my gegee het
kan gebruik om tot diens van ander mense te wees

mag ek nooit hierdie kans misbruik nie, Heer
mag ek vele ander lei tot u Eer
mag ek vir altyd hierdie kans onthou
mag slegs die mooie uit my ontvou
mag ek my gesin onvoorwaardelik lief kan hê
mag ek al my probleme en sorge aan u Voete lê
mag ek weekliks u Huis besoek
mag ek daagliks rigting in u Boek soek

Prosa & poësie | 0 kommentare

Bladsye (1842): [ «    1  2  3  4  5  6  7  8  9  10  11  12  13  14  15  16    »]
Tyd nou: So Jul 14 17:47:24 MGT 2024