eiland van verdoemenis
Sa, 22 Oktober 2022 20:21
skaars 'n spikkel op die groot wêreldkaart
daar waar jy aan die voet van reus afrika lê
kompleet asof jy sy beskerming vra
of dalk wil jy sy vergifnis hê
jy is mos geen normale eiland
wat was werklik die doel van jou geboorte
of word jy self deur die reus gestraf
vir al die dood wat jy saai binne jou poorte
geen toeriste baljaar op jou strande
jy is geen tropiese paradys
stormsterk winde verdor jou velde
en die see rondom jou is kouer as ys
tog lê jy op die hoof seeroete
met 'n volle uitsig op die pragtigste baai
binne bereik van die ryk visvelde
maar sonder 'n enkele vis op jou kaai
net soos melaatses en gevangenes op jou moes kom boet
vir dinge wat andere as verkeerd beskou het
word jy ook gestraf vir die blote feit
dat jy hul hier weg van hul geliefdes gehou het
Prosa & poësie |
0 kommentare
die voëllughawe
Sa, 22 Oktober 2022 20:19
nie ver van hier staan daar ‘n reuse boom
wat gedurende die dag slegs as skaduplek dien
maar soggens vroeg en laatmiddag word dit ‘n voëllughawe
wanneer derduisende voëls uit alle rigtings
in sy ryk blaredos verdwyn
die jongste nuus en die dag se gebeure
word in verskeie voëltale en -dialekte met mekaar gedeel
en soos die nuwe vlugte aankom
word kennise en familie gesoek om boodskappe oor te dra
terwyl nuwe vertrekvlugte saamgestel word
dan begin die eerste vlugte weer vertrek
met tussenposes van enkele minute
op die lang tog na iewers ver van hier
Prosa & poësie |
0 kommentare
die sterretjie in die hemelruim
Sa, 22 Oktober 2022 20:18
net soos een van die tien miljoen speldeprikgaatjies
in die donkerblou rollerblinding van my ouma se spaarkamer
sit jy vasgeplak aan die naguitspansel
in die middel van die dag
omring deur die kamerdonker
lê ek op die bed
en wens dat ek deur die speldeprik kon vlieg
om die wêreld aan die anderkant te kon ontdek
in die middel van die nag
omring deur die nagdonker
lê ek op die grasperk
en wens dat ek tot bo-op jou kon vlieg
om die wêrelde aan jou anderkant te kon sien
en die mense wat op jou woon te kon ontmoet
Prosa & poësie |
0 kommentare
die skouerkabouter
Sa, 22 Oktober 2022 10:35
jou stoute kabouter wat so oor my skouers klouter
jy maak my baie seer elke keer as ek probeer
om jou te tug oor die dinge wat jy kwytraak hier op my rug
as ek jou in die hande kry gaan daar niks oorbly
van jou grote bek wat jy so lief is om te rek
maar al slaan ek so woes ontglip jy my houe deur te spring en te koes
eintlik is jy ‘n goeie ou as jy net wil onthou
dat jy moet leer om te luister en in my oor te fluister
eerder as om op jou rug te lê en jou sê te sê
Prosa & poësie |
0 kommentare
ek het vir jou baie lief
Do, 20 Oktober 2022 17:46
ek skrywe hierdie gediggie vir jou
om te sê hoe oneindig lief ek is vir jou
jy bring ‘n vonkel na my oog
as ek sien hoe die liefde uit jou hele wese ontvou
die totale oorgawe waarmee jy bak en brou
die teerheid waarmee jy ‘n stukkende voëltjie teen jou bors vashou
die sagtheid waarmee jy wasgoed oor die wasgoedlyn vou
jy bring ‘n wysie na my oor
as ek hoor hoe die liefde diep vanuit jou binneste opbou
die warmte waarmee jy klein gebeurtenisse onthou
die fermte waarmee jy die gesin omvou
die manier waarmee jy lagspiere ontklou
jy bring ‘n klop na my hart
as ek besef hoe gelukkig ek is om jou te mag hê as my vrou
Prosa & poësie |
0 kommentare
die vlinderhuis
Do, 20 Oktober 2022 17:39
‘n huis vol vlinders
is byna soos ‘n huis vol kinders
jy moet so versigtig stap
dat jy nie per ongeluk een raak trap
want hulle bly bo en onder en langsaan jou
met elke tree wat die pad vorentoe ontvou
hulle is onbeskryflik mooi
in die natuur se kleureprag getooi
en beweeg so sag
soos maar slegs ‘n vlinder mag
maar anders as in ‘n huis vol kinders
gebeur alles sonder klank in die huis vol vlinders
Prosa & poësie |
0 kommentare
die mediatribunaal
Wo, 19 Oktober 2022 09:31
die regering het my so pas weer gefaal
met die aankondiging van die beplande mediatribunaal
waarmee hulle die pen en klawerbord wil snoer
deur soos “groot broer” oor elke skrywer se skouer te loer
hulle het hiermee my laaste greintjie respek en geloof
vir ewig uitgedoof
al my vertroue is van die gesprektafel weggevee
bloot deur die feit dat een van hulle kon dink aan die idee
maar gelukkig is daar niks wat hulle van ons kan weerhou
wat erger kan wees as die skokke en mislukkings wat ons sal onthou
as hul “suksesse” as regering van die afgelope 16 jaar
en die manier hoe elkeen van hulle hul waardes openbaar
en dan is daar mos ook nog die kragtige mond
soms klein soms groot soms plat soms gerond
met lippe dun of dik dalk reguit of getuit
waarteen hulle die bekendmaking van korrupsie nie kan stuit
Prosa & poësie |
0 kommentare
die merk van die dier
Sa, 15 Oktober 2022 08:45
vir die meeste van ons is elektrisiteit soos die son
dit is maar altyd daar sonder dat jy daaraan hoef te dink
totdat dit afgeskakel word
en jy ‘n ietsie warms soek om te drink
dis dan wanneer jy in die motor spring om gas te gaan koop
en met skok besef hoe baie mense word eintlik hierdeur geraak
want die gaswinkel is immers ook sonder krag
en op die paaie heers ‘n chaos omdat die verkeersligte staak
gefrustreerd en dors daag jy op by die werk
en begin naarstiglik na dokumente op jou lessenaar soek
dan onthou jy jy het vergeet om dit gister te druk
en die komper is af en jy smag na die era van die boek
mismoedig besluit jy om te skakel en uitstel te vra
maar die telefoon is buite werking en jou lugtyd is op
dan pak jy maar weer die lang pad huis toe aan
om die dag af te sluit met ‘n yskoue maal en ‘n brandewyndop
uitgeput en vuil gaan kruip jy maar in
want die televisie en radio en warmwatersilinder slaap alreeds
en jou gedagtes gaan na die merk van die dier
is elektrisiteit dalk ons 666 - jy weet nie, maar jy wonder steeds
Prosa & poësie |
0 kommentare
die onbenullige nul
Sa, 15 Oktober 2022 08:43
vir die meeste van ons het “nul” geen waarde
maar dis eintlik ‘n woord wat so baie beteken
dit kan verhoudings verskeur en ook laat versoen
tog besef ons nie altyd wat ‘n “nul” kan doen
want van al die mense hier op aarde
is daar min wat sy werklike waarde kan bereken
mense sê gereeld iemand is die “nul” op die kontrak
maar as ek kon sê watter kontrak ek sou wou hê
sou dit daardie een wees met ses “nulle” in ‘n ry
want neem die “nulle” uit miljoen en kyk wat jy kry
ek sou nie my toekoms sonder “nulle” kon belê
so, dat ‘n “nul” geen waarde het, is pure twak
Prosa & poësie |
1 kommentaar
Supertaal
Blog
Soek
Hulp
Lede
Registreer
Teken aan
Tuis
RSS
