o Gog, help ons
Do, 18 Augustus 2022 15:31
o God help ons in hierdie steeds pragtige land
om die wil te hê om dit pragtig te hou
sodat ons kinders ook die mooi van u Skepping mag aanskou
en dit vir hul kroos kan bewaar
om eendag lank hierna te kan sê
“baie dankie God vir ‘n pragtige land”
o God help ons in hierdie eens veilige land
om die moed te hê om dit weer veilig te maak
sodat ons kinders ook die veiligheid van u Skepping mag smaak
voordat hulle nie meer hul eie kroos kan hê
om eendag lank hierna te kan sê
“baie dankie God vir ‘n veilige land”
Prosa & poësie |
0 kommentare
ek mis jou, pa
Do, 18 Augustus 2022 15:30
ek weet jy hou my dop van daar bo
om te sien hoe jou jongste sy lewe lei
maar pa ek mis jou so
ek weet nie altyd hoe om die dag om te kry
want jy sou my antwoorde op so baie vrae kon gee
vrae wat byna uurliks die rede vir die lewe
soos waasbeelde deur my breinkamers kom vee
en wat my liggaamlik van vrees laat bewe
omdat ek nie die antwoorde daarop ken
en jy nie meer daar is om my te help om hierdie stryd te wen
Prosa & poësie |
0 kommentare
'n glimlag
Do, 18 Augustus 2022 15:28
‘n glimlag word beskou as die teenoorgestelde van ‘n traan
maar die waarheid lê eintlik baie ver hiervandaan
want net soos daar ‘n traan van vreugde bestaan
maak ‘n glimlag soms ‘n spesifieke pyn ongedaan
waar kom ‘n glimlag en ‘n traan dan vandaan
as hulle so hand aan hand met mekaar gaan
dalk raak ek hier ‘n baie teer plekkie aan
want hulle is eintlik opponente, maar hulle verskyn so spontaan
Prosa & poësie |
0 kommentare
'n traan
Do, 18 Augustus 2022 15:27
‘n traan kan so baie dinge sê
aan die persoon wat daarna kyk
sonder dat die traandraer dit wou hê
dat die boodskap van die traan so moes lyk
soos dit tans op die kyker se geheuebeeld lê
Prosa & poësie |
0 kommentare
baie dankie God
Do, 18 Augustus 2022 15:25
U het in my lewe ingegryp
op ‘n manier wat ek nie kon verstaan
maar U het my ook die krag gegee om voort te gaan
voort te gaan met die wete dat U altyd by my is
saam met my pragtige gesin
die vrou en dogters vir wie ek so bemin
so bemin nie omdat ek in rykdom lewe
maar omdat ek elkeen van hierdie mense
sien as individue met liefde sonder grense
sonder grense wat my bind
sodat ek elke dag as ‘n gawe mag ervaar
en besef ek is nog ‘n dag gespaar
dag gespaar om U te prys
vir die wonderlike gevoel wat dit bring
om die Skeppingswonder te besing
Prosa & poësie |
0 kommentare
die plaas in die kloof
Do, 18 Augustus 2022 15:24
iewers in ‘n swartbergkloof
is daar ‘n plaas wat ek nooit sal vergeet
omdat ek daar met die natuur en geloof
as kleuter kennis kon maak
sonder die vloek van kraanwater en elektrisiteit
wanneer ek my oë sluit
sien ek alles wat op die plaas gebeur
ons kinders klouter die hoë berge uit
sodat mans en vroue in vrede kan swoeg
om reuse disse vir maaltye gereed te kry
maar iemand het die plaas van sy hart beroof
want daar is nie meer ‘n opstal
op angelierbos in die swartbergkloof
gelukkig verskyn beelde van die ou opstal
steeds op foto’s in albums en in my geheue
Prosa & poësie |
0 kommentare
die druppels in ons lewe
Do, 18 Augustus 2022 13:42
terwyl die ruitveërs
soos die swaaiende arms van ‘n verwoede beer
die vallende druppels van die ruit wegvee
sodat dit nie my sig kan belemmer
dink ek onwillekeurig aan die druppels in ons lewe
die druppels wat kilometers ver uit die hemel val
en elke stofbedekte wese (lewend en nie-lewend) reinig
asook elke holte (bo- en ondergronds) vul
sodat plant en dier
heerlik aan mekaar mag smul
die druppels wat as ‘n stroom uit die kraan se bek val
en die mens se moeë liggaam reinig
asook elke kospot vul
sodat mens en dier
heerlik aan die gereg mag smul
die druppels wat uit die oë oor die wange rol
en die mens se traumagevulde siel reinig
asook uiting aan ‘n opgewekte lagbui gee
sodat elke opregte mens
daarmee meegesleur word
Prosa & poësie |
0 kommentare
mikrokosmos
Do, 18 Augustus 2022 13:41
die besige heuningby
sal jy altyd tussen blomme kry
waar hulle stuifmeel soek
vir die maak van die heuningkoek
die arbeidlustige mier
is nie oorspronklik van hier
maar is uiters aanpasbaar
om op enige plek nes te skop en kos te vergaar
die asemrowende vlinder
moet jy nooit verhinder
as jy hom in jou tuin ontmoet
en hy jou met sy kleureprag groet
die peslike vlieg
wat meer sit as vlieg
kan net jou dag versuur
terwyl jy klappe in sy rigting stuur
die nimlike liewenheersbesie
is die welkome spesie
wat dag na dag na dag
die luise op jou spogplante jag
die haatlike muskiet
bring net verdriet
as dit jou bloed en nagrus kom steel
en die spieël wys jy het jou nie verbeel
Prosa & poësie |
0 kommentare
totsiens mamma
Do, 18 Augustus 2022 13:39
bitterlik diep sny die seer
soos ’n skelpel so diep
om u so vreeslik stil en eensaam daar te sien lê
maar dan onthou ek dat dit juis is wat u vir soveel jare reeds wou hê
omdat u gevoel het dat u taak hier op aarde volbring was
maar dit was nie
want u het steeds soveel gehad om aan ander te gee
daar is nog massas vrae wat ek u wou vra en ook soveel dinge wat ek u wou sê
maar nou is dit te laat
want u het reeds u finale sê gesê
met die woorde van daardie pragtige afskeidsgebed
wat vir ewig in my hartsargiewe bewaar sal bly
al sny die seer so bitterlik diep
is ek nie kwaad nie
omdat ek verstaan dat u hierdie finale rus verdien
want vir meer as ’n eeu
het u u selfs in die moeilikste tye
oor ander ontferm sonder om ’n enkele klagtewoord daaroor te uiter
u gaan nou na ’n onbekende wêreld ver verwyderd hiervandaan
om aan die sy van u Skepper met ou kennisse en familie te herenig
ek gaan u vreeslik mis maar baie baie dankie vir ’n wonderlike lewe
en vir alles wat u vir my moes opoffer
vergewe my asseblief vir die tye waar ek u in die steek gelaat het
ek wil u graag nog ’n laaste guns vra:
wanneer u by pappa kom vertel hom hoe lief ek hom het en hoe baie ek hom mis
Prosa & poësie |
0 kommentare
dankgebed
Do, 18 Augustus 2022 13:37
baie dankie Liewe Heer
vir die wonderlike
maar onverdiende gawe
om my eeue oue moeder
in haar swakste uur te kon besoek
baie dankie vir die voorreg
om deur haar herken te word
en in gesprek met haar te kon gaan
om haar brose hande in myne te kon neem
terwyl sy ons in gebed aan U opdra
baie dankie dat ek hierdie besoek
in die teenwoordigheid
van my pragtige vrou en dogter kon hê
en weer kon besef hoe gelukkig ek is
hoeveel gawes U daagliks aan my voete lê
ek weet dat ek soms baie vrae vra
en seker ook oor te veel dinge kla
daarom bring ek U hierdie korte dankgebed
want het my moeder my nie gebaar
sou ek hierdie dankiewoorde nooit kon sê
Prosa & poësie |
0 kommentare
Supertaal
Blog
Soek
Hulp
Lede
Registreer
Teken aan
Tuis
RSS
