totsiens mamma
Thu, 18 August 2022 13:39
bitterlik diep sny die seer
soos ’n skelpel so diep
om u so vreeslik stil en eensaam daar te sien lê
maar dan onthou ek dat dit juis is wat u vir soveel jare reeds wou hê
omdat u gevoel het dat u taak hier op aarde volbring was
maar dit was nie
want u het steeds soveel gehad om aan ander te gee
daar is nog massas vrae wat ek u wou vra en ook soveel dinge wat ek u wou sê
maar nou is dit te laat
want u het reeds u finale sê gesê
met die woorde van daardie pragtige afskeidsgebed
wat vir ewig in my hartsargiewe bewaar sal bly
al sny die seer so bitterlik diep
is ek nie kwaad nie
omdat ek verstaan dat u hierdie finale rus verdien
want vir meer as ’n eeu
het u u selfs in die moeilikste tye
oor ander ontferm sonder om ’n enkele klagtewoord daaroor te uiter
u gaan nou na ’n onbekende wêreld ver verwyderd hiervandaan
om aan die sy van u Skepper met ou kennisse en familie te herenig
ek gaan u vreeslik mis maar baie baie dankie vir ’n wonderlike lewe
en vir alles wat u vir my moes opoffer
vergewe my asseblief vir die tye waar ek u in die steek gelaat het
ek wil u graag nog ’n laaste guns vra:
wanneer u by pappa kom vertel hom hoe lief ek hom het en hoe baie ek hom mis
Prosa & poësie |
0 kommentare
dankgebed
Thu, 18 August 2022 13:37
baie dankie Liewe Heer
vir die wonderlike
maar onverdiende gawe
om my eeue oue moeder
in haar swakste uur te kon besoek
baie dankie vir die voorreg
om deur haar herken te word
en in gesprek met haar te kon gaan
om haar brose hande in myne te kon neem
terwyl sy ons in gebed aan U opdra
baie dankie dat ek hierdie besoek
in die teenwoordigheid
van my pragtige vrou en dogter kon hê
en weer kon besef hoe gelukkig ek is
hoeveel gawes U daagliks aan my voete lê
ek weet dat ek soms baie vrae vra
en seker ook oor te veel dinge kla
daarom bring ek U hierdie korte dankgebed
want het my moeder my nie gebaar
sou ek hierdie dankiewoorde nooit kon sê
Prosa & poësie |
0 kommentare
God, help ons pragtige land
Wed, 17 August 2022 09:52
die mense van hierdie pragtige land het hulle nooit aan die res van wêreld gesteur
omdat die res van die wêreld nooit werklik geweet het wat presies hier gebeur
soms het ons saam gejuig en op ander kere het ons saam getreur
want ons geskiedenis het wye draaie geloop en aandvuurvertellings is ryklik gegeur
al het die apartheidsregering menige gesinne en gemeenskappe uitmekaar geskeur
maar daar was orde
en respek
ten spyte van al die apartheidsborde
en mense het gesterf en nie soos diere gevrek
want dit is presies wat nou in hierdie eens pragtige land gebeur
omdat die vryheidsregering hom nie aan die voortbestaan van die land en sy mense steur
‘n land waar die mense - mans vrouens en kinders - nie meer kan gil en huil maar slegs kan treur
omdat staatsgoedgekeurde misdaad dag en nag Godgegewe menselewens uitmekaar uit skeur
en reuke uit die natuur oordonder word deur buskruit en bloed se geur
Prosa & poësie |
0 kommentare
blote genade
Tue, 16 August 2022 16:28
vandag is die eerste sonskyndag na ‘n week van reën
en ek gebruik dit om besoek by elke plantjie in die tuin af te lê
en die kleur en geur van elke blom op die dataskyf in my brein vas te lê
terwyl ek die nuwe groei van die verskillende vrugtebome bewonder
duiwe, mossies, vinke en spreeus maak beurte om die voëlbad te gebruik
en ander na wurms en goggas en pitjies op die grasperk en stoep stap en soek
dis asof die tonele wat hier afspeel, kom uit die blaaie van ‘n sprokiesboek
en ek as toeskouer vanuit ‘n heel ander era van buite af daarna kyk
maar met ons vier aktiewe honde wat my op hierdie tuintoer vergesel
word alle twyfel oor sprokies en werklikheid vinnig uit die weg geruim
wanneer ongevraagde gate gegrawe word en plante verdwyn sonder versuim
want hulle is net so dankbaar vir hierdie sonskyndag na die week se gewag
uit die voëlhokke word die jongste nuus met die wilde voëls in die bome gedeel
terwyl my pragtige vrou en twee dogters besig is om die huis aan die kant te maak
elkeen op haar eie manier en volgens haar unieke smaak
om alles in plek te hê voordat ek en die honde dit weer om gaan krap
dan besef ek opnuut hoe gelukkig ek werklik is
om soveel genade van my Skepper te ontvang
want ek besit die beste wat enige mens na kan verlang
goeie gesondheid, pragtige gesin, liefdevolle diere en geloof in God
Prosa & poësie |
0 kommentare
taalprag
Tue, 16 August 2022 16:27
ek gaan kyk want die veiligheidslig brand
who is there and what does he want
ndicela isonka nekofu kuba ndiyabanda
hy is honger en dors en kry baie koud
tell him to move before I set him afloat
ndicela ukutya kuphela andiceli irawuti
waar kom jy vandaan en wat is jou naam
stop chatting for strangers are not allowed on the farm
igama lam lingusipho kuba andiyazi liphi ikhaya lam
ek gee ‘n homp brood en twee appels al wou hy koffie hê
what are you doing is he still there
enkosi kakhulu mnumzana sala kahle
Prosa & poësie |
0 kommentare
as ek maar net kon
Tue, 16 August 2022 11:25
as ek kon vlieg
vlieg na die buitenste rand van die uitspansel
verby die plekke waar sterrestelsels in vervloë millennia was
en waar nuwe melkweë besig is om gevorm te word
op pad na die plek waar die ganse Skepping ontstaan het
met jou veilig op my rug toegewikkel
sou ek jou aan die hand kon neem
om saam met my die oorsprong van die liefde te ervaar
maar ek kan nie
as ek kon vlieg
vlieg oor die lengte en breedte van die uitspansel
en by al die melkweë aan kon gaan
om elke sterrestelsel deeglik te bestudeer
op soek na die heel mooiste planeet wat bestaan
met jou veilig op my rug toegewikkel
sou ek jou aan die hand kon neem
om saam met my ‘n nuwe lewe daar te begin
maar ek kan nie
as ek maar net kon
want ek het jou so verskriklik lief
Prosa & poësie |
0 kommentare
winterkou'
Tue, 16 August 2022 11:24
ek sit hier voor die komper
om die gedigte in my hart af te laai
sodat hulle op ‘n kompakskyf
en later op papier verewig kan word
buite woed ‘n storm
reuse reëndruppels word met veel groter haelstene afgewissel
en deur ‘n allesdeurdringende wind
teen muur en ruit en dakplaat vasgeplak
die stompe in die kaggel
gloei dieprooi van trots
en die honde kyk wie die naaste
aan die hittekring kan lê
dan dwaal my gedagtes na die bergie en die straatkind
wat iewers daar buite na ‘n droë plekkie soek
om hul kartonmatras en koerantpapierkombers
oop te sprei as teenvoeter vir die winterkou’
Prosa & poësie |
0 kommentare
waarom?
Tue, 16 August 2022 11:22
ek vra en vra
maar almal voel ek pla
ek dink en dink
het alle weergawes ingedrink
ek het die Woord gelees
en meer geleer van die vlees en die gees
maar ek kan steeds nie verstaan
waar kom al die misdaad vandaan
Prosa & poësie |
0 kommentare
straatgesin
Tue, 16 August 2022 11:21
sag val die reën op die struik
die struik wat as tuiste vir vyf mense dien
‘n ouerpaar en hul drie jong kinders
kinders wat môre uitgerus en vars
die skoolbanke moet trotseer
wind kom van veraf sneeubedekte pieke
die takke van die struik in beweging bring
dieselfde takke wat die mense moet beskerm
terwyl die sagte reën nou in vlae neergiet
en die struik se blare in stortkoppe omvorm
velle stukkende vullissakplastiek
word haastig oor die kinders
soos motgevrete komberse oopgesprei
kinders wat weens die reën
nog niks warms ingeneem het nie
kartonmatrasse word al natter
soos water by die gate in die plastiek inloop
terwyl die kinders probeer slaap
deur die geluid van die storm
met koue- en hongerpyne wat al veller knaag
wat steeds nag is vir baie mense
word opstaantyd vir hierdie gesin
want hulle moet die struik ontruim
voor die spitsverkeer begin
en stap om die kinders betyds by die skool te kry
moeg en vaak en honger en dors
bereik die kinders die skool teen skemerlig
met ‘n reuse glimlag word elke maatjie hartlik gegroet
dan word die kinders gegroet en omhels
deur moeë ouers wat so graag slegs die beste vir hul kinders wou gee
Prosa & poësie |
0 kommentare
Supertaal
Blog
Soek
Hulp
Lede
Registreer
Teken aan
Tuis
RSS
