waarom bosbewoner
Mon, 01 August 2022 19:35
onbeskermd teen die aanslae van die natuur
sonder geriewe soos bed en tafel en stoel
berei jy jou maaltye langs 'n ope vuur
terwyl jou hond en kinders baljaar in 'n poel
dieselfde poel waarin jou vrou jul klere was
waarna sy dit vir droging oor die bosse sprei
omdat geen wasgoedlyn op jul perseel sal pas
dis dan net 'n grote bos waaronder jul bly
soos elkeen van ons het jy in 'n huis gewoon
saam met ander kinders in die strate gespeel
terwyl jou ouers geswoeg het vir hul weekloon
van die lewe het hul jou geleer elke reël
wat jy later aan jou eie kinders oordra
toe jy en jou vrou met jul eie huis begin
dit moes iets vreesliks wees wat jul daar toe so pla
dat jul besluit het dis nie goed vir jul gesin
wat het dan werklik daardie dag verkeerd geloop
dat jul besluit het om al die gerief te los
party van die goed het jul seker eers verkoop
om eerder te gaan bly met niks onder 'n bos
was geld die oorsaak van daardie dag se besluit
of het iets anders jul dalk daardie daad laat pleeg
ons moet weet, want dis verkeerd en ons moet dit stuit
want dit laat word ons tronke vol en skole leeg
Prosa & poësie |
0 kommentare
help ons asseblief o Heer
Sun, 31 July 2022 21:22
ek weet ek vra vir baie dinge Heer
maar hierdie keer
moet ek U vra om die ondergang van ons land te keer
want die regering was nog nooit en is steeds nie in beheer
ek weet nie wat hulle probeer
deur met die mense so gek te skeer
maar ek weet die mense se harte is baie seer
want ek sien daagliks hoe hulle treur
oor die dinge wat met hulle en die land gebeur
terwyl die regering hulle glad nie aan die geweeklaag steur
omdat hulle hulle blindstaar aan selfverryking se geur
mense word besteel, verkrag, vermoor en uitmekaar geskeur
pragtige mense wat ten spyte van dit alles steeds vorentoe beur
en deur die bloed kan dankie sê vir die natuur se kleur
slegs U o Heer
kan ons mense en ons land van ondergang keer
want bo alles is U steeds die Een in beheer
ons mense se wonde en harte is baie seer
maar steeds sal ons ons bes probeer
al voel dit soms of ons net nie meer
die krag het om hierdie euwel te keer
Prosa & poësie |
0 kommentare
rou seer, rou stukkend
Sun, 31 July 2022 21:21
naak lê sy daar op haar rug
in die koud van die nag
steeds lewend en oopgesny
met haar ingewande in die sand aan haar sy
driekeer deur vriende verkrag
onherkenbaar verbrand lê sy langs die straat
sonder enige arms en bene
omdat sy vir haar ouers ‘n beter lewe wou gee
sonder om te weet van haar beskermer se weë
die man met ‘n pedofiel se gene
verwurg lê sy in die bed se laai
ingedruk om haar weg te steek
sonder dat dit hom pla
dat dit die bed is van sy eie ma
nadat ‘n vriend haar verkrag het terwyl sy om haar lewe smeek
rou seer was hierdie tienermeisies se lot
rou stukkend was hul ouers se vrae aan God
terwyl die regering partytjie hou en anderpad kyk
Prosa & poësie |
0 kommentare
herfs
Sun, 31 July 2022 21:19
ek stap deur die tuin
soos elke ander dag
om na die plante
en die uitleg te kyk
terwyl blomme en blare
van verskillende kleure op die grasperk en in die beddings val
en dan dring dit tot my deur
dat ek eintlik na een van God se lewende skilderye kyk
Prosa & poësie |
0 kommentare
hallo herfs
Sun, 31 July 2022 21:18
soos die skoenlapper wat uit die papie ontvou
om sy lewensreis
in die planteparadys
te begin
voel ek vandag ook nuut en skoon en vars
en baie opgewonde
oor al die geleenthede wat ek elke stonde
sal kan ontgin
want die eerste herfsbui het geval
Prosa & poësie |
0 kommentare
afrikaans - sterwende taal
Sun, 31 July 2022 21:16
die grootste afrikaanse digter van ons tyd
skryf in die koerant dat afrikaans gaan sterf
omdat ons regering afrikaans by die deur uit smyt
sodat engels die amptelike landstaal kan word
terwyl besighede en skole en universiteite
alles wat afrikaans is in die dreinpyp stort
maar ‘n taal word nie sommer dood gewens
want dit is lewende mense wat dit praat
en ons taal vloei alreeds oor menige grens
afrikaans mag miskien sy wetenskapstatus verloor
maar die opkomende jeug het reeds bewys
hoe hulle met dig en drama en sang kan toor
om afrikaans lewend en fris en gesond te hou
sodat die res van die wêreld afrikaans kan sien
as die afrikataal wat alle nasies en kulture omvou
Prosa & poësie |
0 kommentare
wanneer wil vergaan
Sun, 31 July 2022 19:34
wanneer ‘n doofstom kind opgewek ‘n storie aan ‘n horende vertel
is dit wil
wanneer ‘n blinde kind trots die woorde uiter waaroor hy met sy vingers streel
is dit wil
wanneer ‘n beenlose man knersend die wedloop in sy rolstoel aflê
is dit wil
wanneer wil vergaan
o God, gee krag
Prosa & poësie |
0 kommentare
my land - suid-afrika
Sat, 30 July 2022 22:10
as pasgebore kind
het ek my in een van die heel pragtigste lande bevind
‘n land waar mense van verskillende kulture
in spontane harmonie met mekaar lewe
‘n land waar ‘n dierverskeidenheid
daagliks die vlaktes en riviere en lugruim deel
sonder om die natuur te ontneem van sy ryke plantverskeidenheid
as opgroeiende kind
het ek my in een van die politiekbedrywigste lande bevind
‘n land waar mense van verskillende kulture
in haat teenoor alle witmense lewe
as gevolg van die apartheidsbeleid
wat nie-wittes verbied om die land met wittes te deel
‘n land waar miljoene mense met nuwe oë kyk na hul eie identiteit
as destydsgebore kind
is dit een van die heel gevaarlikste lande waarin ek my bevind
‘n land waar mense van verskillende kulture
in uiterste vrees vir ander mense lewe
weens die misdadigers se moordmetodeverskeidenheid
‘n land waar mense daagliks moor en verkrag en steel
as gevolg van ‘n algehele gebrek aan ‘n misdaadbeleid
Prosa & poësie |
0 kommentare
om werklik arm te wees
Sat, 30 July 2022 19:32
om sonder geld vir ‘n maaltyd op die tafel te wees
is van die ergste wat met iemand kan gebeur
om sonder hoop vir die dag van môre te wees
is om iemand se hart in stukke te skeur
maar om sonder geloof in God te wees
is die heel ergste wat met iemand kan gebeur
want dit is om werklik arm te wees
Prosa & poësie |
0 kommentare
is dit sien en hoor of is dit kyk en luister
Thu, 28 July 2022 13:44
"sien" en "hoor"
dis twee woordjies wat ons baie graag gebruik
ons sien en hoor hulle elke dag in verskeie vorms
ons gebruik hul tuis, op skool, by die werk en
ja, selfs in die parlement
as ons mooi sou kyk en luister
dan sou ons sien en hoor
dat ons met sien en hoor
nie altyd sien en hoor
dít wat ons veronderstel is om te sien en te hoor
dis omdat ons net sien en hoor
in plaas van om te kyk en te luister
want as ons sien en hoor
weet ons nie waarna om te kyk en te luister
omdat ons dink sien is kyk en hoor is luister
ons kan net werklik sien as ons eers kyk hoe iets lyk
so kan ons ook net hoor as ons luister wat iemand fluister
want sonder om te kyk, weet ons nie hoe dit lyk
en sonder om te luister, weet ons nie wat word gefluister
want sien is mos nie kyk en hoor is mos nie luister
Prosa & poësie |
0 kommentare
Supertaal
Blog
Soek
Hulp
Lede
Registreer
Teken aan
Tuis
RSS
