POLITIEKE onderstrominge onder ANC-raadslede in Dihlabeng die
afgelope jaar en langer het Maandag op 'n geslote vergadering skerp
wanklanke na vore gebring toe die raad glo eensydig en ongrondwetlik
besluit het raadslede mag glo nie meer met die media praat nie.
Net die burgemeester, mnr. David Lengoabala, mag glo van nou af met
die media praat.
Daar word glo reeds geruime tyd ondergronds geprobeer om van die
munisipale bestuurder, mnr. Motlatsi Molefe, ontslae te raak omdat hy
nie huiwer om die beweerde korrupsie en wangedrag van raadslede aan
die kaak te stel en te probeer uitroei nie. Hy is glo om dié rede
uiters ongewild onder sekere ANC-raadslede. Die optredes en pogings
om van Molefe ontslae te raak, het die afgelope maande klaarblyklik
ook in 'n heksejag ontaard.
Die Dihlabengse munisipaliteit was sedert die oorname van die nuwe
ANC-raad dikwels in die spervuur in Vrystaatse en Gautengse koerante.
Dié media het onder meer oor die volgende berig:
Die sigbare agteruitgang van Bethlehem, eens 'n munisipaliteit wat
landwyd hoog aangeslaan is, is skerp gekritiseer deur lede uit die
gemeenskap weens die beweerde onoordeelkundige finansiële bestuur
sedert die ANC die vyf dorpe (Bethlehem, Clarens, Fouriesburg,
Rosendal en Paul Roux) begin bestuur het.
Die beweerde bedrog deur drie ANC-raadslede, wat steeds nie deur die
polisie in hegtenis geneem is of deur die raad geskors is nie,
ondanks dokumentêre bewyse dat hulle wel moontlik skuldig kan wees,
is onaanvaarbaar vir belastingbetalers. Twee ander amptenare is
steeds geskors sonder enige skuldigbevindings in 'n openbare hof. Nog
een is met betaalde verlof. Hulle word steeds maandeliks deur die
munisipaliteit vergoed en daar word niks gedoen om hulle dissiplinêr
aan te kla nie.
Die beweerde persoonlike skuld van Lengoabala, asook sy beweerde
onvermoë tot goeie persoonlike finansiële bestuur. Sy beweerde
munisipale skuld van sowat R52 000 is glo op aandrang van sy
prokureur verdeel en na twee rekenings verskuif. Dié stap is volgens
regskenners teenstrydig met alle goeie munisipale beginsels.
Die raad se verdere eensydige opstelling van die begroting vir 2002-
'03 en inkonsekwente en hoë tariefverhogings het daartoe gelei dat
die Dihlabeng-inwonersvereniging besluit het om 'n trustrekening te
stig waarin erfbelasting eerder inbetaal kan word. Talle
belastingbetalers trek reeds die erfbelasting af wat te veel gevorder
is vir Julie en Augustus 2002. Daar is ook nog geen uitsluitsel oor
die vullisverwydering wat nie tydens die staking van munisipale
werkers verwyder is nie en deur belastingbetalers geweier word om te
betaal. Daar is 'n ooreenkoms tussen die munisipaliteit en
belastingbetaler om die vullis te verwyder teen betaling. Die dienste
is nie gelewer nie en geld mag volgens die DIV nie deur die
munisipaliteit gevorder word nie.
Vrystaat as 'n nie-rassistiese en nie-politieke gemeenskapskoerant
glo sterk in die vryheid van die pers en om vreesloos oor die
waarheid te berig in belang van Oos-Vrystaatse gemeenskappe. Vrystaat
sal derhalwe voortgaan om ware en billike feite aan die hele Oos-
Vrystaatse gemeenskap bekend te maak. Die deur van die koerant staan
oop vir al sy lesers.
BETHLEHEM. - Die donker wolk van onsekerheid oor personeelplasings
en -skommelings wat reeds lank oor die Dihlabeng-munisipaliteit hang,
het 'n verdere laagtepunt bereik met die aanstelling van sowat 'n
dosyn nuwe senior amptenare en amptenare deur die burgemeester.
Die aanstellings word deur dr. Clem Harrington, prokureur en 'n DA-
raadslid, beskryf as voorbarig, omdat daar geen
personeelplasingsbeleid in plek is nie. Daar word verder deur kenners
gesê dat dié aanstellings boonop onwettig is, omdat die raad nie in
die aanstellings geken is nie. Die raad het vroeër wel 'n organogram
goedgekeur. Die burgemeester, mnr. Patrick Jacobs, het dit skynbaar
as sy magtiging aanvaar om poste te adverteer en mense aan te stel
sonder om sy raad daarin te ken.
'n Personeellid wat nog houtgerus-gelukkig in sy (of haar) werk
was, moes ná 'n tyd van verlof glo vind iemand anders is nou in dié
betrokke pos aangestel. Daar is nooit met die betrokke personeellid
hieroor gepraat, ooreengekom of onderhandel nie.
Dit kom nadat meer as 40 poste stil-stil in September in 'n
Gautengse en 'n Engelse Oos-Vrystaatse koerant met beperkte
verspreiding geadverteer is. Die raad het die poste nie in enige van
die ander Afrikaans- of Engelstalige dag- en weekkoerante in die
Vrystaat of Oos-Vrystaat, wat wyd versprei word, geadverteer nie.
Kenners en belastingbetalers wil weet of daar nou van die ou
personeel ontslae geraak gaan word. Hulle wil ook weet waarom daar
nie professioneel en wettig met personeel gekommunikeer en
onderhandel word oor hul poste nie en of die munisipaliteit al die
aanstellings, wat R1,2 miljoen per jaar gaan beloop, kan bekostig.
'n Woordvoerder van 'n vakbond het aan Vrystaat gesê die ironie
van die aangeleentheid is dat die raad kundige en ervare mense nou
opsy stoot en mense sonder enige of dieselfde soort ervaring in hul
plek aanstel. Die sogenaamde personeelpoelbeleid onder die vaandel
van transformasie en regstellende aksie het glo nou in werking
getree. "Kundigheid, ervaring en bekwaamheid is duidelik nie meer vir
die Dihlabengse besluitnemers belangrik nie," sê die
vakbondwoordvoerder. Vrystaat het ook verneem die posbeskrywings van
die nuut aangestelde personeel het geen voorskrifte vir opleiding
nie.
Die nuwe munisipale bestuurder, mnr. Mothibedi Matshele van Gauteng,
het op 1 Desember diens aanvaar nadat hy en die raad glo ooreengekom
het op 'n salaris van sowat R550 000 per jaar (alles insluitend).
Totdat hy eie akkommodasie in Bethlehem bekom het, gaan sy verblyf
in 'n gastehuis in Bethlehem die munisipaliteit sowat R6 500 per
maand uit die sak jaag. 'n Woordvoerder wat nie sy naam genoem wil hê
nie, sê die munisipaliteit het wel geldelik voorsiening gemaak vir al
die aanstellings. Daar was glo besparings op die begroting vir 2003-
'04 wat al die uitgawes moontlik maak.
Rassisme en onkundigheid speel beslis 'n rol
Charles Miller
Na aanleiding van 'n onlangse brief in die Herald rakende toets-
beamptes, wil ek graag my ervaring met lesers deel. Ses onderwysers
van Randfontein is onlangs deur toetsbeamptes van Carletonville se
verkeersafdeling vir Kode 10-lisensies getoets. Al die betrokke
persone het verskeie bestuurslesse ter voorbereiding ontvang. Die
eerste kandidaat se afspraak was om 08:00 maar hy moes wag tot 08:20
omdat die baan in orde gekry moes word. Toe hoor hy dat daar 'n
dubbele bespreking is en dat hy weer moes wag. Tien minute later het
sy toets begin met twee toetsbeamptes, en nog tien minute later was
sy toets verby. Volgens die twee toetsbeamptes wat tussen 40 en 50
meter van die voertuig gestaan en gesels het, het die voertuig 'n
millimeter terugbeweeg teen die bultjie. Nie die kommentaar van die
bestuurskoolpersoneel of ander ooggetuies kon hulle oortuig nie. Op
die toetsvorm is die kandidaat ook verskeie kere gepenaliseer vir
aktiwiteite wat wel korrek uitgevoer is. Ongelukkig was die hoof van
die lisensie-afdeling by wie hy 'n klagte aanhangig wou maak, op
daardie stadium nog nie op kantoor nie en kon die assistent-hoof,
mnr. Riaan Theunissen, slegs voorstel dat die saak na die
inspektoraat verwys word. Hy het wel genoem dat daar net een
toetsbeampte tydens die toets teenwoordig mag wees. Moes hulle mekaar
dan in hulle getuienis ondersteun? Die suksesvolle persone moes die
volgende dag terugkeer vir die uitreiking van die lisensies. Na vier
ure se rondstuur tussen bakoord na stuurboord met onvolledige vorms,
onkundige en onwillige personeel, kan niemand ons kwalik neem as ons
meen dat rassisme, algehele onbekwaamheid en ongeorganiseerdheid 'n
groot rol in hierdie martelproses gespeel het nie. Mnr. Moses
Maselesa, bestuurder: openbare veiligheid en sekuriteit van die
Merafong-munisipaliteit, antwoord: Daar word deeglik kennis gedra van
mnr. Miller se brief en al die frustrasies soos uiteen gesit. Hierdie
kantoor wil dit egter op rekord stel dat die provinsiale inspektoraat
dieselfde dag van die voorval in kennis gestel is. Daar is besluit
dat die betrokke toetsbeampte reg opgetree het om die applikant te
laat druip vir die aktiwiteit wat uitgevoer was. Die betrokke persoon
is genooi om 'n volgende afspraak kosteloos te maak vir sy
bestuurders-lisensie. 'n Ander toetsbeampte sou hom/haar toets. Die
kantoor wil egter inwoners aanraai om enige probleme en frustrasies
wat op grondvlak ervaar word, by die toesighoudende personeel van
daardie betrokke afdeling aan te meld. Daar word dringend aandag
gegee aan alle klagtes of probleme, soos omskryf deur die Bato Pele
(mense eerste) beleid.
Boer woedend oor verlies van 13 beeste
Christine van der Westhuizen
"As 'n plakkershut afbrand, word daar net komberse en kos aangedra,
maar niemand gee om vir die boere nie. Niemand vra: kan ek help?" Dit
is die moedelose woorde van 'n boer in die Doornfontein-omgewing wat
dertien "lieflingbeeste" binne nege dae aan die hand van veediewe
verloor het. "Hierdie barbare steel nie omdat hulle honger is nie.
Dit is 'n besigheid. Geen mens kan soveel beeste opeet nie," sê die
boer wat verkies om naamloos te bly. In die eerste voorval is vyf
stoetverse wat pas vir die eerste keer gedek was, afgeslag. "Dit is
nie net vyf beeste nie. Hierdie verse kon nog vir veertien jaar
vorentoe gekalf het. Ek het dus vyf maal veertien beeste verloor." In
die tweede voorval is nege beeste geslag. Twee karkasse wat die diewe
blykbaar nie kon wegdra nie, het op die toneel agtergebly. Volgens
die boer steel veediewe eerder verse want bulkallers is te wild.
Skape word gesteel deur 'n plastieksak oor hul koppe te trek sodat
hulle nie kan blêr nie. "Ons boere meen die regering gee nie 'n duit
om nie en die polisie se hande is afgekap. Die regering moet die
polisie meer mag gee om veediewe aan te vat. "Dit lyk my die regering
geniet dit dat ons op pad is om in 'n tweede Zimbabwe te ontaard."
Die boer sê die woede wat hy in hom voel is genoeg om 'n
veedief "dood te ry" as hy op hom sou afkom. "Dan sal hulle seker sê
ek is 'n rassis, maar dit het niks met rassisme te doen nie, dit
is 'n misdaad." Hy moes noodgedwonge van sy 90 stoetbokke en al sy
skape ontslae raak omdat die diefstal daarvan eenvoudig hand uitgeruk
het. "Hoe moet ek aanhou boer as tussen R40 000 en R50 000 van my
stoetvee jaarliks gesteel word? Ons boer nie met gewone vleisbeeste
nie. 'n Stoetbees is 'n bees met identiteit, jy weet wie is sy ma en
sy pa." Hy verwys na 'n voorval vroeër die jaar in Kwa-Zulu Natal
waarin twee vermeende veediewe se ore en hande afgekap is en wonder
of plakkate van dié voorval nie veediefstal sal stopsit nie. "Ons
boere aanvaar die nuwe regering en die veranderinge wat aangebring
is. Maar hoe kan ons vir hulle stem as hulle niks doen om ons te help
nie?"
'n Pasiënt van die Carletonville Hospitaal is in hegtenis geneem ná hy
glo op heterdaad betrap is terwyl hy seks met 'n lyk in een van die
hospitaalsale gehad het. Hy het Maandag in die Oberholzer-landdroshof
verskyn waartydens sy borgaansoek geweier is. Die saak is vir verdere
ondersoek uitgestel. 'n Saak van poging tot verkragting (nekrofilie)
word tans teen hom ondersoek. Die man, glo in sy twintigerjare, is
Donderdag omstreeks 17:00 betrap. Die hoof uitvoerende beampte van
die Carletonville Hospitaal, mnr. Lungile Dukwana, het bevestig dat
die polisie besig is met 'n ondersoek na die beweerde verkragting.
Volgens hom is die hospitaal ook besig met 'n interne ondersoek
waarmee hulle hoop om meer feite oor die voorval in te win. Dit moet
ook nog vasgestel word hoe die pasiënt toegang tot die lyk kon gekry
het. Dukwana sê die hospitaal is geskok en betreur die beweerde
gebeurtenis. "Die welstand van ons pasiënte is vir ons baie
belangrik," sê hy. Volgens hom is die familie van die oorlede vrou
reeds oor die gebeurtenis in kennis gestel en die hospitaal se
simpatie is aan hulle oorgedra. Hy sê sienende dat die voorval tans
deur die polisie ondersoek word, kan daar nie verder kommentaar
gelewer word nie.
Afrikaners stroom om 'verlede te onthou'
ALET RADEMEYER
PRETORIA. - Afrikaners het gister van heinde en ver na die
Voortrekkermonument buite Pretoria gestroom om die "verlede te
onthou", "ons kinders hul erfenis te leer" en "God se nabyheid op te
soek".
Sowat 6 000 mense het die Geloftediens bygewoon.
Die monument was stampvol en vroue en kinders, jonges en grysaards
het onder tente gesit. Honderde het gewag totdat die sonlig net ná
12:00 op die senotaaf geval het waarna Die Stem gesing is.
As deel van Versoeningsdagvierings was me. Luli Callinicos, prof.
Willie Esterhuyse en me. Helen Sebidi, lede van die raad van trustees
van die Vryheidspark, gister gaste op die Geloftediens terwyl
uitvoerende lede van die Voortrekkermonument se historiese vereniging
op uitnodiging van die trustees van die Vryheidspark verrigtinge by
die Uniegebou bygewoon het.
Dit was gister die eerste keer dat nie-Afrikaners op die byeenkoms
ontvang is om die plegtigheid van 16 Desember mee te maak.
Vir talle was gister 'n eerste be soek aan die monument, terwyl
ander "op die paaie van die geskiedenis teruggeloop het".
Kleuters is aan die hand van ma's en pa's vertel van
Voortrekkertannies wat met ossewaens oor die Drakensberg getrek het
en wat by Bloedrivier gebeur het toe 464 Boere duisende Zoeloes
verslaan het.
"Dis vir my 'n hartroerende, hartseerdag. Ek is al oud en dis vir my
moeilik om te verander. Ek het vandag hier vergifnis gevra vir as ek
verkeerd was," het 'n emosionele mnr. Paul Bester (60) van Welkom
gesê.
"Ek is eintlik 'n Hollander, maar 'n mens voel saam met die Afrikaner
oor sy verlede," het Trish van der Poel (18) van Cullinan gesê .
Mnr. John Rodrich van Kimberley kom al vier jaar om sy "kinders van
hul erfenis te leer".
Me. Sam Scaife van Midrand het gekom omdat dit "iets is wat ek nog
altyd wou doen". Haar vriend, mnr. Arif Mahomed, het gesê dit pla hom
glad nie dat hy een van enkele anderskleuriges was nie. Hy sê dit
was 'n cool en insiggewende ervaring.
Marishka en Franco Breytenbach (9), 'n tweeling van Ermelo, was veral
beï ndruk met hoe goed die monument gebou is. Dit was ook vir hulle
lekker om te kan hoor en sien wat met hul voorouers gebeur het.
Mnr. Sampie de Beer (69) van Carletonville het onthou hoe hy in 1949
met 'n fakkel uit Potchefstroom gehardloop het vir die inwyding van
die monument. "Ek sê dit kan nog goed gaan. Ons moet net besef dit
help nie om om te kyk nie."
Prof. Piet Strauss, hoofleier van die Voortrekkerbeweging, het die
diens gelei. Hy het gesê die vraag is soos telkens in die
verlede: "Afrikaner, waar gaan jy heen? En die antwoord: Terug na U,
my God." Hy het gesê versoening is alleenlik bereikbaar as mense weer
na die wil van God vra en die samelewing op Christelike waardes begin
bou. "Die Afrikaner sal alleen reg op voortbestaan hê as hy sy
gemeenskap rig op die Bybel en Christelike waardes. Ons voortbestaan
hang nie af van die meerderheid wat bereid is om ons te verdra nie,
of van die Grondwet nie. Dit hang af of ons na die wil van God vra en
Sy eer soek."
'SA vorder, maar land bly verdeel'
Eagan Williamson en Mandy Rossouw
Die Suid-Afrikaanse samelewing bly verdeeld en min mense omhels die
idee van nasionale eenheid, het pres. Thabo Mbeki Dinsdag by die
Versoeningsdagseremonie by die Uniegebou in Pretoria gesê.
Hy het gesê baie vordering is gemaak om die land te herbou en
versoening te bewerkstellig, "maar ons moet ook erken dat baie nog
gedoen moet word".
Verskeie politieke leiers het die regering se uitnodiging aanvaar om
Dinsdag se viering by die Uniegebou by te woon.
Saam met Mbeki was mnre. Tony Leon, DA-leier, Daryl Swanepoel, NNP-
hoofsweep, en Cassie Aucamp, NA-leier. Dr. Pieter Mulder, leier van
die VF+, het die viering by die Voortrekkermonument bygewoon het.
Meer as 2 000 mense het by die Uniegebou opgedaag terwyl sowat 6 000
by die Voortrekkermonument was.
Die organiseerders van die Uniegebou-viering het sowat 20 000 mense
verwag vir die seremonie wat sowat R13 miljoen gekos het.
Mbeki het gesê dit is nou die tyd vir alle Suid-Afrikaners om hulle
tot 'n mense-kontrak te verbind vir die verbetering van die land,
onder meer om rassisme, armoede en dakloosheid te beveg. "Ons het 'n
stewige fondament gelê om op te bou."
Hy het gesê dis belangrik dat die helde van die stryd teen apartheid -
diegene verantwoordelik vir die geboorte van die nuwe Suid-Afrika -
erkenning kry en geëer word.
Aucamp het gevra dat die dag nie gepaard gaan met "volkshoogmoed
en 'n beskouing dat Afrikaners God se uitverkore volk in Suid-Afrika
is nie".
Hy het gesê die dag is 'n "teken van roepingsbesef" en het Afrikaners
herinner aan die "taak en roeping wat Afrikaners steeds in Suid-
Afrika het".
Leon het gesê politici moet gewoond raak aan die idee van politieke
opposisie omdat dit gesonde politieke wrywing veroorsaak en daarom
tot nuwe en konstruktiewe idees lei.
Volgens Leon is die ware toets vir versoening eerder die "oorgee van
mag".
"Toe die ANC aan die bewind gekom het, was dit 'n kritieke tyd in die
land se geskiedenis. Die klimaks sal wees wanneer hy sy mag afstaan
aan 'n opposisie wat 'n oorwinning by die stembus behaal het."
Swanepoel het elke Suid-Afrikaner uitgedaag om te help met die proses
om die nasie byeen te bring.
Mulder het in sy verklaring na die vakansiedag as "Geloftedag"
verwys en gesê as Afrikaners "feeste soos Geloftedag" moet
prysgee, "is die prys te duur en die versoeningsresep verkeerd".
Mulder het sy besorgdheid uitgespreek oor apatiese Afrikaners en
gesê "hul negatiwiteit verlam mede-Afrikaners omdat hulle kritiseer
sonder om oplossings aan te bied".
NG ouers wil stokkie steek voor 'kettery'
16/12/2003 22:17 - (SA)
NG ouers wil stokkie steek voor 'kettery'
Predikant het na bewering kinders van kerkraadslede op jeugkampe
herdoop
COBUS GROBLER
KAAPSTAD. - Enkele ouers het reeds aangedui dat die NG gemeente
Brackenfell-Wes se geskorste ds. Chris Swart nie volgende jaar hul
kinders mag katkiseer nie.
Dit is nog een van die skokke wat dié verdeelde gemeente die afgelope
twee maande getref het.
In die jongste stap het die gemeente se ring Swart verlede week oor
sy "siening van die doop" van sy predikantspligte onthef.
Die besluit sal hersien word as die ringskommissie en Swart voor 20
Januarie vergader.
'n Sweer het oopgebars toe mev. Cobie Swart, leraarsvrou, die
gewraakte kerktoring in 'n brief 'n "manlike fallus"genoem het "wat
voortdurend met die godin van die lug seksuele gemeenskap" het.
Ds. Swart het ook al gepreek: "Die Here sê die toring moet verwyder
word."
'n Besluit van die kerkraad om die toring af te breek, is later
herroep en daarmee saam is die egpaar Swart se siening oor dié
kerkgebou se toring verwerp.
Verskeie gegriefde lidmate het gekla oor "kettery" met wederdopery,
handopleggings in 'n klein vertrek, vervulling met die Heilige Gees,
vlagswaaiery, 'n charismatiese bedieningstyl en ander dwaalleringe
wat in die gemeente onder die vaandel van verandering posgevat het.
Selfs senior kerkraadslede se kinders wat as babas gedoop is, is glo
op jeugkampe herdoop.
'n Voormalige kerkraadslid, wat nie sy naam genoem wil hê nie omdat
almal die swye opgelê is en daar teen senior lidmate opgetree is wat
met die media gepraat het, het gesê sy kind moet volgende jaar deur
Swart gekatkiseer word. "Ek weier dat dit gebeur. Ons vertrou hom nie
meer nie."
Daar is ook klagtes dat 'n groepie meelopers of vertrouelinge van
Swart glo ander gemeentelede intimideer en selfs ander kerkgroepe
help om pamflette, onder meer teen die toring, in die omgewing te
versprei.
Swart self wou nie kommentaar lewer nie omdat die besluit oor sy
skorsing nog hangende is.
Bloedrooi die aalwyn langs
die slingerpad.
Dis of daar vonke uit
elk vuurpyl spat.
Maar niks, niks roer nie . net
'n luggie wat
skrams aan die ritselende
grassate vat.
Daarbo die blou, blou lug,
daaronder die rivier
wat deur die boorde kronkel met
'n groene swier.
Niks stoor die yle swewende
bergstilte hier.
Ná al die jare maak ek weer
'n plaashek oop.
Waar het my paaie
tog nie geloop
om my hier by 'n hek te bring
van al my waan gestroop,
maar met my denke helder
en in my hart die hoop?
Die hek staan in die skad'wee van
'n kremetart.
Die stilte in my's volkome met
niks troebels, niks verward.
Ek lig die knip . Ek maak
'n hek oop in my hart.
Ek lees dat hulle beplan het vir 20 000 mense by die Uniegeboue gister en
toe net sowat 2 000 opgedaag het? Nou's Mbeki nie lekker daaroor en voel
dat die mense in SA nie wil versoen nie? Dieslefde ding gebeur jaar na
jaar hier by ons in Nam. Swapo huil omdat die blanke mense nie hul
onafhanklikheidsvierings wil bywoon nie en dat die mense nie wil versoen
nie.
Nou wil ek nie reguit sê politici is oor die algemeen mense wat nie in
gewone beroepe kon slaag nie, maar mens wonder oor hul 'common sense'. Hoe
kan iemand die een dag die blankes sleg sê vir alles wat moontlik verkeerd
kan wees en die volgende dag verwag hy moet by 'n politieke byeenkoms gaan
'versoen'? Alles op sy eie koste ook nogal: Hy moet self daar kom met sy
eie vervoer en wat is die kans dat by sy kar ingebreek of sommer in die
geheel gesteel gaan word? Alles net vir die voorreg om 'man op man' by die
grootbaas te hoor hoe sleg jy en jou mense dan nou is? Dalk moet iemand
vir hierdie intellektuele reuse in die oor fluister dat dié manier van hulle
juis die teenoorgestelde bereik? Praat redelik, en jy kry redelikheid.
Supertaal
Blog
Soek
Hulp
Lede
Registreer
Teken aan
Tuis
RSS
