Supertaal: Koeitjies & kalfies » Jotti en Namibië

Tuis » Algemeen » Koeitjies & kalfies » Jotti en Namibië

Wys: Vandag se boodskappe :: Stemmings :: Navigasie

Jotti en Namibië [boodskap #115463]

Wo, 14 November 2007 14:40

PietR
Boodskappe: 3341
Geregistreer: Julie 2003

Karma: 0

Senior Lid

Ons het al gesels oor die onderwerp en as mens ooglopend van vandag se
situasie kyk, dan is dit maklik om 'n wanindruk te kry. Toe die eerste
kaarte van die land geteken was, was daar g'n grenslyne wat enige gebiede
onderskei het nie. Landmeters het die land uitgemeet mbv voetslaan en
perd, donkie en muil en die metings is met kettings gedoen. As jy die ou
Duitse kaarte bekyk, sal jy sien dat die areas in die noorde van die land is
Owambo gemerk, die oostekant Herero en die suidoostekant Nama of Hottentot,
en so aan. Wat dit beteken het, was dat in hierdie areas van hierdie mense
voorgekom het. Onthou dat hierdie kaarte gemaak is vir gebruik deur Duitse
mense wat kon lees. Dis tog net logies dat die landmeter nie die reg gehad
het om enige area aan enigiemand toe te ken nie, aangesien geen registrasie
of beheerowerheid toe al bestaan het nie.
As jy na die volkere kyk, dan verstaan jy ook hoekom hulle verkies het
om in hierdie areas te bly. Die Hereros was hoofsaaklik beesboere en
daarom het die oostekant se sandveld hulle gepas. Die Owambo het nog altyd
gevrek oor planterasies en dinge en daarom was die natter noorde naby Angola
meer hulle keuse. Die Hottentotte was weer skaapmanne en die suide het in
hulle guns geval. Nie eers die Duitsers het 'n gebied aan die swart mense
toegeken nie. Dit het later gekom met die tuislande van die SA regering.
Maar interessant, die eerste blanke mense in ou SWA was nie die Duitsers
nie! Reeds sover terug as 1791 het daar 'n Guilliam Visagie op die plaas
Swartmodder gewoon....waar Keetmanshoop vandag is! Hierdie ou het 'n
vonnis op die lyf geloop in die ou Kaap en het besluit hy's nou gatvol vir
die veediefstalle en toe trek hy Duits-SWA toe. Dit was in 1783 wat hy hom
op Swartmodder gevestig het. Dis ook waar verstomde sogenaamde pioniers en
ontdekkingsreisigers hom dan ook later gekry het. Vrek interessant is dat
daar vermelding gemaak word van die feit dat Visagie se vrou somtyds 'n trek
van 3 maande Kolonie toe onderneem het om te gaan goete koop. Vroumense
het nie veel verander nie, hm?
Dan is daar die storie van waarde. Ons het mos voorheen gesels oor die
koopkrag van goedere in ruilhandel. Daar word vertel dat vir een gesoute
perd, kon jy 30 bees kry. Voeg jy vandag se R3000 per bees by dit, dan
het die perde R90 000 vir 'n perd in koopkrag betaal. As 'n ou dus 'n stuk
grond oorneem by van die stamhoofde om plaas te maak, en hy hoes 30 perde,
dan het die ou vandag se R2,7 miljoen betaal aan koopkrag. Dit bring
vandag se R2,5 tot 4,0 miljoen vir 'n 5000ha plaas maar net in lyn met
mekaar. Niemand het grond verniet gekry nie.
Kosie Pretorius, parlementariër in ons land, het op 'n kol, in reaksie
op los stellings gemaak deur van die Swapo-manne, hulle uitgedaag om vir hom
'n ENKELE bewys te bring van 'n geval waar 'n blanke grond verniet in ou SWA
ontvang het. Hyself het ook die geskiedenis daaroor oopgekrap en kon nie
'n enkele bewys kry nie. Waar wel misverstande ontstaan het, is die feit
dat die SA regering aan soldate wat in die wêreldoorloë gaan baklei het, die
reg gegee het om plaasgrond te koop onder 'n makliker-betaal skema. Maar
betaal, die moes hulle. Hulle het rou stukke grond gekry waarop 'n enkele
boorgat was, geen behuising, geen drade nie. Net 'n handpomp op die
boorgat waarmee hulle vir die diere water moes pomp uit die boorgat uit.