| " Taalkadastraal " deur T.T. CLOETE [boodskap #98407] |
Sun, 19 September 2004 00:16 |
bouer
Boodskappe: 4795
Geregistreer: December 2003
Karma: 0
|
Senior Lid |
|
|
TAALKADASTRAAL
T. T. Cloete
ons het elke klip lief van die land
elke plek, ons het hom vol geurige name geplant
soet waatlemoen suursout hondepisbos.langs die beesklou
lê ons spoor versigtig getrap. In die Nossob van Kousant
oor Kij-kij na Kameelsleep en Dikbaardskolk
loop ons spoor. daar is 'n mooi manier van verbrou
die kerkoomhot die sonkyker is 'n ouvolk
ander name is ryk opgeneuk
tot in die see se gekreukelde alikreuk
vindingryk is Riemvasmaak vasgemaak, die katstert
is raak mimiek en die aantelerige trassiebos. die
hartbeeshuis
is 'n onderhoudende fout. die kameelperd
is 'n fout en die muishond, die ystervark en volstruis
daar is regte maniere van verspreek
Onseepkans. van Beenbreek
het ons met ons tong en hand
aan alles gevat
van bo tot onder van die geliefde land
tot in die wortel van die witgat
daar is die mooiste taalverhaal
van die malgas en tarentaal
en die klein swart bittersoet nastergal
my land se kadastraal
is gekleim in my taal
ons het die grond met ons speeksel en sweet bewerk
soos die bok en renoster het ons dit gemerk
met ons urine. soos die voël en katdier
hulle leefruim merk met drek en anale klier
so het ons hom met ons taal bewerk
hy ruik na ons skatoon
in die drolpeer en dassiepis bewoon
ons die land
ons sit diep in hom vas
diep en vas soos 'n kiestand
in sy kas
ons hou hom in stand
met sy fontein en woestynsand
ons klim op uit die kloof na die bergkam
en woon tot waar die horison die vlaktes opdam
ons wat deur mond
en voet en hand
met die wind en water en grond
'n verwantskap het en 'n verband
met die planeet deur ons onvervreembare land
in 'n onuitroeibare goddelike taalverbond
ons sit soos klitsgras
aan hom vas
sy kadastraal
is afgesteek in my taal
|
|
|
|
] 
Supertaal
Blog
Soek
Hulp
Lede
Registreer
Teken aan
Tuis
