| " villanelle vir die vertroude geliefde " deur TOM GOUWS [boodskap #73272] |
So, 09 Februarie 2003 13:06 |
|
|
Oorspronklik gepos deur: @rogers.com
Tom Gouws
villanelle vir die vertroude geliefde
vir retha
die verborge dieper drif van liefde soek ek terug in spesery.
in die kos van die seisoen, geliefde, proe ek jou delikaat;
intiem op die tong kom lê jy sag soos smaak in my.
somersdae vind ek jou in koljander en kardamom; ek kry
jou saans in die geur van naeltjies, ook in neutmuskaat.
die verborge dieper drif van liefde soek ek terug in spesery,
en betrap jou, geliefde, as my vingers herfs voorberei
met wonderpeper en tambryn, donker mosterdsaad.
intiem op die tong kom lê jy sag soos smaak in my.
in die winter is jy aromatiese anys; soos pypkaneel bly
jy nahuiwer in my mond, soet soos die woorde wat jy praat.
die verborge dieper drif van liefde soek ek terug in spesery:
jy is die rissieprikkeling van lente; in saffraan skuil jy
onbeskaamd, in die onsubtiele huiwering wat knoffel laat.
intiem op die tong kom lê jy sag soos smaak in my.
die verborge dieper drif van liefde soek ek terug in spesery.
intiem op die tong kom lê jy sag soos smaak in my.
|
|
|
|
] 
Supertaal
Blog
Soek
Hulp
Lede
Registreer
Teken aan
Tuis
