Radiospeler Radiospeler
 
Supertaal
Kom praat saam!

Tuis » Ernstig » Nuus » Kaal uitgetrek in selle
Kaal uitgetrek in selle [boodskap #120205] Ma, 01 Desember 2014 18:16
Etienne Marais  is tans af-lyn  Etienne Marais
Boodskappe: 370
Geregistreer: Maart 1997
Karma: 0
Senior Lid
"'n Man is kaal uitgetrek en erg aangerand, deur 'n groep van 10 verhoorafwagtendes in die polisieselle."
http://mobserver.co.za/22093/kaal-uitgetrek-in-selle/

---

"Dit was net hou, op hou, op hou..." het mnr. Carel van der Schyff afgemete vertel.

Die berugte selle het al 'n inwoner se lewe geëis, nadat hy selfmoord gepleeg het omdat hy daar verkrag is en 'n bekende advokaat het gesê dat hy 'n traumatiese ondervinding in die selle gehad het.

Hy wou nie daaroor uitwei nie.

Nagmerrie in polisieselle vir Carl van der Schyff:

Mnr. Carel van der Schyff wou aanvanklik nie praat oor die gebeure toe hy in die polisieselle aangerand is nie, maar toe hy begin vertel, is dit asof hy die woorde wil uitspoeg.

"Ek slaap nie, my vrou slaap nie en my kinders slaap nie. Netnou word ons wéér geviktimiseer!"

Asof dit pas met hom gebeur het, vertel hy hortend hoe een van die verhoorafwagtendes sy kop tussen sy bene vasgeknyp het, terwyl die ander sy hande vashou en sy klere afstroop. Daarna het die eerste hou langs sy kop geval. Die slag langs sy oor was só gewelddadig dat hy steeds nie mooi kan hoor nie.

Hy het genadiglik tussen die houe op sy lyf op 'n stadium sy bewussyn verloor en eers later wakker geword en sy klere aangetrek.
Mnr. Carel van der Schyff is só hard aan die kant van sy gesig geslaan dat hy steeds nie mooi met dié oor kan hoor nie.

Die skokkende realiteit is dat mnr. Van der Schyff nooit in dié sel moes gewees het nie, aangesien sy borg rééds betaal was en aanklaers later die saak uit die hof gegooi het, omdat hy onregmatig aangekla is.

Die aanloop tot die gebeure was Woensdagmiddag toe mnr. Van der Schyff op aandrang van mnr. Anton Human drade gaan knip het op 'n perseel wat IT Investments onlangs gekoop het (hoek van Beyers Naude- en Wesstraat).

Mnr. Human sê hulle het al 'n geruime tyd probleme met 'n man wat weier om van die erwe wat hulle gekoop het, pad te gee.

Woensdag het hy genoeg gehad en besluit om die draad te knip, sodat daar met bouwerk van 'n muur begin kon word.

Die polisie het kort hierna opgedaag en mnr. Van der Schyff, wat besig was om die draad te knip, gearresteer op 'n klagte van "opsetlike saakbeskadiging". Daar is verskeie kere vir die polisie deur middel van dokumentasie gewys dat die grond aan hulle behoort, maar mnr. Van der Schyff is steeds polisiestasie toe geneem.

Hy is in die aanhoudingsel geplaas. Mnr. Human het intussen hul regsverteenwoordiger, me. Johan-Lee Benadie, in kennis gestel en sy het ook opgedaag. Hulle het verskeie kere aan die polisie probeer verduidelik dat die grond aan hulle behoort en dat mnr. Van der Schyff net gedoen het wat vir hom gesê is.

Daar is intussen R1 000 borg vasgestel en betaal. Teen hierdie tyd, omstreeks 18:00, was dit skofruiling en kapt. Timothy Dladla het aan diens gekom.

Me. Benadie sê sy is toegang tot haar kliënt geweier en terwyl sy en mnr. Human besig was met onderhandelings het hulle mnr. Van der Schyff vir 'n rukkie nie gesien nie. Toe hulle terugkom by die polisie gemeenskapsentrum, was mnr. Van der Schyff nie meer in die aanhoudingsel nie.

Mnr. Van der Schyff sê kapt. Dladla het hom aan die arm gevat en na die aanhoudingselle vir verhoorafwagtendes gedwing.
"Daar was tot menslike ontlasting teen die mure gesmeer!" vertel hy van sy nagmerrie.

Kapt. Dladla het met die verhoorafwagtendes gepraat en mnr. Van der Schyff toegesluit.

Die oomblik toe die seldeure toegaan, het die ander verhoorafwagtendes op mnr. Van der Schyff toegesak.

"Hulle het vir my geskree: 'wat het jy aan die kaptein gedoen?' Ek het vir hulle gesê ek het niks gedoen nie. Hulle het egter begin vloek en skree en gesê dat 'die kaptein sou nie gesê het dat ons jou moet uitsorteer as jy niks gedoen het nie!" Net daarna het hulle sy klere uitgepluk en hom aangerand. In die proses is sy staalarmband ook van sy arm afgesteel.

Na 'n geruime tyd, mnr. Van der Schyff kan nie onthou hoe lank nie, het die kaptein teruggekeer. "Hy het sy eie foon vir die verhoorafwagtendes gegee om privaat oproepe te maak om vir hulle dankie te sê!"

Mnr. Human het bekommerd begin raak oor mnr. Van der Schyff en hom gaan soek. Op hierdie oomblik het kaptein Dladla met hom aangestap gekom.

Mnr. Human en me. Benadie het dadelik besef hy is aangerand. 'n Kolonel het intussen by hulle aangesluit, die situasie opgesom (ook hy het gesien mnr. Van der Schyff is aangerand) en hulle na 'n kantoor geneem waar verklarings geneem is.

• Klagtes van onder meer aanranding is teen die verhoorafwagtendes aanhangig gemaak.

• Me. Benadie het aangedui dat 'n siviele aksie ook binnekort kan volg.

• Die volgende oggend is mnr. Van der Schyff saam met sy regsverteenwoordiger hof toe. Nadat alle dokumentasie gewys is, is die saak uit die hof gegooi en mnr. Van der Schyff se borggeld is aan hom terugbetaal.

• Kol. Leonard Hlati (provinsiale polisiewoordvoerder) het Woensdagoggend gesê dat daar beslis 'n ondersoek sal volg.

• Jare gelede is 'n jong man in die selle geboender vir gesinsgeweld waar hy deur verskeie mans verkrag is. Hy is vrygelaat omdat daar 'n gebrek aan getuienis was. Die dag toe hy vrygelaat is, het hy selfmoord gepleeg.

• Adv. Hein Brauckman moes sowat twee jaar gelede ook 'n nag in die selle deurbring. Hy het nie uitgebrei oor die gebeure in die selle nie, maar net gesê dat daar 'n traumatiese voorval plaasgevind het.
Vorige onderwerp: Glorieryke Nuwe Suid-Afrika: Onskuldige boer word met 'n petrolbom aan die brand gesteek
Volgende onderwerp: Trump en Kim ontmoet in Singapoer
Gaan na forum:
  

[ XML-voer ] [ RSS ]

Tyd nou: Ma Mei 27 18:44:54 MGT 2024