| Hiawatha en die Denneboom van Vrede [boodskap #16340] |
Do, 23 Julie 1998 00:00  |
G.B.
Boodskappe: 2174
Geregistreer: Mei 1997
Karma: 0
|
Senior Lid |
|
|
So, op 18 Julie, dieselfde dag as wat Mandela glo
getroud is, is ons dogter getroud in die kapel van die
Mohawks. Dit was 'n lekker koel dag tussen twee weke
van hittegolwe. (Dis nou te wyte aan die baie sterk muti
waaroor die ma van die bruid beskik.)
Dis nie 'n baie groot kerk nie. Maar dit het baie mooi
gekleurde glasvensters, wat die geskiedenis van die kerk
en van die Konfederasie van Ses Nasies vertel. Veral die
eerste venster was vir my baie mooi. Daarin staan die figuur
van Hiawatha in volle gewaad. Hiawatha was die leier van
'n stam in Noordelike New York staat wat verantwoordelik
was vir die stigting van 'n federasie van Vyf Nasies (wat
later die Federasie van Ses Nasies geword het.) Eintlik was
Hiawatha maar net onder die invloed van Deganawidah, 'n
groot geestelike leier wat van noord van Lake Ontario gekom
het om sy boodskap van vrede aan die stamme verder suid
te bring. Deganawidah het egter gehakkel en Hiawatha het
sy spreekspersoon geword. Deganawidah het die Denneboom
van Vrede aan die stamme bekend gestel. Die beroemde
gordel van Hiawatha (vandag in 'n museum in Albany, N.Y.)
vertel van hierdie geskiedenis.
Die name van die ses stamme van die Federasie van Ses
Nasies is die Seneca, Cayuga, Onondaga, Tuscarora, Oneida
en Mohawk. In hierdie konfederasie het vroue 'n baie groot
rol gespeel. By geboorte neem die kind die stamverband van
die moeder oor. Die ouer vroue het vandag nog belangrike
funksies in die struktuur van die stamme.
Gedurende die Amerikaanse Vryheidsoorlog het hierdie
stamme die woude van noordelike New York staat verlaat
en hulle noord van Lake Ontario gevestig. Die Haldimand
Treaty van 1784 het vir hulle 760,000 akkers land gegee as
kompensasie vir die land wat hulle verloor het in wat vandag
die VSA is. Nodeloos om te sê, die land is vandag nie meer
onder hulle kontrole nie, behalwe vir 'n klein stukkie wat
vandag bekend staan as die �Six Nations Reserve� buitekant
Brantford.
Gloudina Bouwer
|
|
|
|
|
|
] 
Supertaal
Blog
Soek
Hulp
Lede
Registreer
Teken aan
Tuis
