| Re: So hou ons partytjie..... [boodskap #14409] |
Vr, 08 Mei 1998 00:00 |
M.Kruger
Boodskappe: 91
Geregistreer: Maart 1997
Karma: 0
|
Volle Lid |
|
|
Die partytjies klink almal lekker interessant. Moenie ophou nie.
'n Goeie partytjie op die plaas, (dis nou wanneer die statussimbole
weggebere is) kry my nog vas geanker aan die hartland van Afrika.
Worsie Visser op die draaitafel, grappe van alle kleure en geure, wyn uit
die soete boorde van die Boland, en laat- aand vir Koos Du Plessis, met sy
Vierde Horison-versameling agter die mikrofoon in - voluit.
Koos Wye Voete(KWV)-brandewyntjie kry so hier en daar aftrek met 'n ysie en
soet suiwer bergwater verdun;
Koos sing:" Die huis toe gaan pad is die pad wat jy vat as jou siel verdor,
maar jou oë bly nat,
En jy loop maar jy weet jy het die koers vergeet, lê die huis toe pad
tussen hoop en weet...."
Donkermaan word die stadsgaste per Land Cruiser teen die berg uitgeneem om
sterre te gaan kyk op die "eerste plate". 'n Skietlamp verras die Koedoes
en ander boksoorte, en 'n Kaapse Rooie'tjie word aangestuur vir hitte. Die
met hoogtevrees sit dieper weg in die bak, en neurie Koos se nostalgiese
deuntjies vir die nagdiere.
Teen hoenderkraai is ons al deur al die politieke ellendes: van die
verregse tot die Muslim-aanslae teen die land.Die regerende party word
gedissekteer en verpak in lae van sosialiste tot aards kapitaliste, en al
die verwarrende alliansiegroepe tussen-in.
Die tiener-telge het handdoek ingeggooi met die weerbarstige ouers uit die
sestigs en sewentigers, en 'n gevoel van welbehaaglikheid skuif saam met
die Suiderkruis oor die werf.
Ons triomfeer saam met 'n paar skrywers oor die uitdagings van die lewe,
ruil nuwe titels uit, en trap die prop van 'n lekker goeie ou port wyntjie
stukkend.
Dis hoogsomer en warm. Beddens en matrasse word in die maanlig ingesleep-
ry op ry, en droomland kom saam met die nonnetjiesuile op die werf aan.
As 'n verdwaalde alarm van 'n senuweeagtige stadsjaap afgaan, waneer 'n
werfhond teen die motorwiel piepie, skrik die lewe uit ons lywe uit, en
moet daar van vooraf port gedrink word om die saligheid te herstel.
Teen ligdag is ons uitgerus, en word wakker in die swembad - so 'n
vroee-oggend lekkerkry. Dan is die wereld reg, en die land 'n paradys om in
voort te woeker.
Die oorskiet word op nuwe kole warm gemaak, die afstammelinge kom fronsend
te voorskyn en kla oor die grootmense wat so gelag en raas het dat g'n siel
kon slaap nie.
Die perde word opgesaal, die proviand hooggestapel op die pakdonkies, die
utopie duur vir nog 'n paar genadige wonder dae voort - die stad slegs 'n
donker bedreiging in die verre toekoms vir sommige van
ons........................
|
|
|
|
] 
Supertaal
Blog
Soek
Hulp
Lede
Registreer
Teken aan
Tuis
